Kooperatîfê Cinîyan ê Evîn yê Wanî ke ame awankerdiş, semedê cinîyan wareyê îstîhdamî awan keno û heto bîn ra zî pawitişê cil û belgê herêmî bi têkoşîn dewam keno. Îdarekara koperatîfî Yildiz Çetîn dîyar kerd ke cinî do bi yewbînan girewtiş, binê pêro zor û zehmetîyan wurzê.
Semedê bidestvistişê ekonomî û tewrbîyayîşê cuya komelî ya cinîyan rolê kooperatîfbîyayîşî pîl o. Kooperatîfê cinîyan semedê cinîyan wareyê îstîhdamî awan kenê û tewrê wareyê cuya komelî benê.
Wan de serra 2015î de Kooperatîfê Cinîyan ê Xoser ame awankerdiş û xeylêk xebatî kerdê. Binê banê kooperatîfî de, sewzî ameyî ramitiş, tirşî ameyî viraştiş, werdê herêmî ameyê viraştiş. La serra 2016î de tayînkerdişê qeyûman reyde kooperatîfî ameyî padayîş.
Kooperatîfê Cinîyan ê Evîn di serrî verê bi amancê ganîkerdişê wareyê berardişê cinîyan, ame awankerdiş. Îdarekara kooperatîfî Yildiz Çetîn derheqê babete de qisey kerd.
‘Krîzê ekonomî tesîrêko pîl serê merdiman de kerdo’
Yildiz Çetîn da zanayîş ke şîdetê cinîyan roj bi roje zêde beno û vat: “Welat de qetilkerdişê cinîyan her ke şino zêde beno. Vernîya nê qetilkerdişan nîno padayîş. Nê problemî cidî yê. Peymana Stenbolî di serrî verê ameye betalkerdiş û badê nê zî şîdet zêde bi. Rolê cinîyan wina yeno dayîş; keye de roniştiş, mitbex de xebate, gedeyan ra ewnîyayîş û hemverê şîdetî de bêveng mendiş o. La ma hemverê nê de têkoşîn kenê. Ma semedê temsîlkarîya têduştî têkoşîn kenê. Krîzê ekonomî tesîrêk pîl merdiman ser o kerdo. Wexto ke keye de werd çinî bo, muxatabê gedeyan dayîk ê. Sey ke berpirsîyarê pêro probleman cinî yê, hesab cinîyan ra yeno persayîş.”
‘Ma serra 2015î de Kooperatîfê Cinîyan ê Xoser awan kerd’
Yildiz Çetîn bale ant muhîmîyê kooperatîfê cinîyan ser o û wina dewam kerd: “Cinî çîyêk nêkerê zî wa kooperatîfan awan bikerê û xebatanê xo bikerê. Ma serra 2015î de kooperatîfê cinîyan ê xoser awan kerd. Nê kooperatîfî de 60 cinî ameyî îstîhdamkerdiş. Xebatê cidî ameyî kerdiş. La qeyûman ra pey kooperatîfî ameyî girewtene. Cinî mexdûr bîyî. Ma nika Kooperatîfê Cinîyan ê Evîne de xebatanê xo domnenê. Yewin amancê ma o yo ke ma cinî destê xo bidê yewbînan û paştî bidê yewbînan. Ma cinî hêzê xo bikerê yew. Ma cinî rolê ke ma rê ameyê ferzkerdiş înan ra vejîyê teber.”
‘Ma dest bi viraştişê erîşteyî kerd’
Yildiz Çetîn wina qedêna: “Kooperatîfê ma hîna zaf hetê tekstîlî de faliyetan keno. Nika ma erîşte virazenê. Ameyox de ma do fetil virazê. La ma hîna zaf cil û belganê kurdî derzenê. Semedo ke kulturê ma vîndî nêbo, ma xebitîyenê.”
