Li herêma Santa Cruz a Bolîvyayê, hêzên dewletê bi gaza îsotê êrişî xwepêşanderên li dijî qeyrana aborî daketine solanan, kir. Di encama êrişê û berxwedana gel de 14 sivîl û 6 polîs birîndar bûn.
Çalakî û xwepêşandanên girseyî yên li Bolîvyayê li dijî qeyrana aborî û polîtîkayên hikûmetê ev zêdetirî mehekê ye didomin, roj bi roj berfirehtir dibin. Roja Şemiyê li bajarokê San Julian a girêdayî herêma Santa Cruz a li rojhilatê welêt, polîsan xwest mudaxeleyî çalakiyên gel bike û di navbera her du aliyan de pevçûnên dijwar rû dan.
Gel li berxwe dide
Hate zanîn ku hêzên dewletê bi armanca vekirina rêya ku demek e ji aliyê xwepêşanderan ve hatibû girtin, êrişî herêmê kiriye. Polîsan di dema êrişê de gaza îsotan bi kar anî, xwepêşanderan jî li hemberî vê şîdetê bi kevir, dar, şewitandina lastîkan û qurmên daran berxwedaneke tund nîşan dan.
14 sivîl, 6 polîs birîndar bûn
Têkildarî bîlançoya bûyeran, Midûrê Emniyeta Santa Cruzê Albay David Gomez daxuyanî da û diyar kir ku 6 polîs birîndar bûne û 4 ji wan bi çekan hatine gulebarankirin. Saziya Mafên Mirovan a Bolîvyayê (Ombudsman) jî ragihand ku di encama êrişa hêzên dewletê de herî kêm 14 sivîl birîndar bûne.
Zêdetirî mehek e çalakî didomin
Li Bolîvyayê, Serokdewlet Rodrigo Paz li hemberî pêla nerazîbûnên civakî yên ku zêdetirî mehekê ye didomin asê maye. Di serî de karker û cotkar, gelek beşên civakê ji ber xizanî û krîza aborî rasterast hikumetê berpirsyar dibînin. Di çarçoveya çalakiyan de li seranserê welêt li nêzî 100 nuqteyan rê hatine girtin. Ji ber van çalakiyan, bi taybetî li paytext La Paz û bajarê cîran El Alto, di warê peydakirina derman, xurek û sotemeniyê de qeyranên cidî derketine holê.
