Meşvanên Meşa Dirêj a bi armanca azadiya Rêberê PKKê Abdullah Ocalan ku bi 26 kesan dest pê kiriye, di roja 13an de li Drancyê bi coş berdewam kir. Meşvanan di meşê de silavên xwe ji berxwedana Rojava û Gabarê re şandin.
Meşa ku di 21ê çileyê de li bajarê Lorîent ê Fransayê destpê kir, di roja 13an de bi coş û piştgiriyeke mezin berdewam kir. Çalakvanên ku di roja 13an de li pêşiya Gara Drancy li hev civiyan, ji aliyê Kurdistaniyên li bajêr ve bi coş hatin pêşwazîkirin. Meş bi coşeke mezin destpê kir û gelek caran dirûşmeyên “Ji Ocalan re Azadî”, “Bijî Serok Apo”, “Bijî Berxwedana Rojava” û “Bijî Berxwedana Gerîla” berzkirin. Çalakvanan silav ji berxwedana Rojava û çalakiyên HPGê yên li Gabarê re şandin û peyamên xwe yên piştgiriyê li kolanên Drancyê veqîrandin.
Meş li pêşiya Şaredariya Drancyê bi daxuyaniyê dewam kir. Meşvanan di daxuyaniyê de wiha gotin: “Em îro di roja 13an a çalakiya xwe de ne. Em ji bo tevlîbûn û piştgiriya gelê xwe spasiya wan dikin. Em çalakiyê ji bo azadiya Rêber Apo, azadiya gelê me û Kurdistanê li dar dixin. Em di qonaxa 2emîn a Pêngava ji Rêber Apo re Azadî, ji Pirsgirêka Kurd re Çareserî de ne. Armanca me ya yekane ew e ku pêngav encam bigre, şert û mercên azadiyê yên Rêbertiya me pêk were û pirsgirêka Kurd çareser bibe.”
Çalakvanan diyarkirin ku berxwedana ku ji Herêmên Parastinê yên Medyayê, heta Rojava û çar aliyên cîhanê dirêj dibe, têkoşîneke yekgirtî ye. Di dawiya çalakiyê de banga tevlîbûnê ya ji bo meş û mitînga ku wê 15ê Sibatê li Strasbourgê bê lidarxistin hat kirin û wiha hate gotin: “Divê hemû gelê me bi mezinkirina vê çalakiyê li Strasbourgê bin.”
