Maseyê încî kefalî yan zî masîpank ke yew bêjê endemîk ê Gola Wanî yo, seba ke zêde bibê, dest bi koçkerdişê ver bi awa şîrîne kerd. Raywanîya încî kefalî rastê eleqeyêka zaf pîl yena û dîmenê zaf rindî vejîyenê orte.
Her serre mabênê 15ê nîsane û 15ê temmuze de wextê zêdebîyayîşê maseyanê Gola Wanî yo. Nê tarîxan de maseyê încî kefalî seba ke hakanê xo ronê û xo zêde bikerê, ver bi çeman dest bi raywanîye kenî. Na raywanîya maseyan seba ke eksê herikîyayîşê awe ya, zaf giran û zehmet derbas bena. Maseyî seba ke şêrê qeraxanê çeman, cayanê german de hakanê xo ronê mîyanê awe, xo awe de peyser çing kenê. Na raywanîye de qaqlîbazî ke herêma Serhedî de sey “Teyrê Keşkan” zî yenî şinasnayîş, vejîyenê seydê maseyan.
Na raywanîye de vernîya maseyan de astengîyê pîlî est ê; çirrê girî, teht û zinarê asê, awa ke bi hawayêko xurt ver bi cêr herikîna… Labelê maseyî bi hîsêko pîroz ê weşîye, yew bi yew xo awe ra erzenî hewa ke na astengîye derbas bikerê.
Seba cuyêka newa, vera herikîyayîşê awe têkoşînêko bêemsal danê; tayê ci ser kewenî, tayê ci zî benî risqê qaqlîbazan. Hetê bînî ra na rewşe seba welatîyan dîmenê rengin û rind vejena orte. Bi hezaran welatîyî seba ke na raywanîya maseyan û şerê mabênê qaqlîbazan û maseyan temaşe bikerê, her serre yenî çirrê maseyan û fotografan gênê. Û eynî wextî de welatîyî dormeyê çemî de seyran kenî.
