Mehmet Polat ku piştî 30 salan ji Girtîgeha Amedê hate berdan ji aliyê malbat, hezkiriyên xwe, TUAY-DERa Amedê û MED TUHAD-FEDê ve hate pêşwazîkirin. Mehmet Polat destnîşan kir ku girtiyên siyasî dixwazin derkevin û hêzê bidin pêvajoya heyî.
Mehmet Polat ku piştî 30 salan ji Girtîgeha Ewlehiya Bilind a Hejmara 1an a Amedê hate berdan ji aliye malbat, hezkiriyên xwe, endamên TUAY-DERa Amedê û MED TUHAD-FEDê ve bi tilîlî, çepik û dirûşma “Bijî berxwedana zindanan” hate pêşwazîkirin. Mehmet Polat kesên ku ew pêşwazî kirin yek bi yek hembêz kir û dû re kevok firandin. Mehmet Polat ku li ber deriyê girtîgehê axaftineke kurt kir, wiha got: “Her çiqas derketin cihê keyfxweşiyê be jî me gelek hevalên xwe li pey xwe hiştin. Heval ji pêvajoya heyî bi hêvî ne. Dixwazin derkevin û hêzê bidin pêvajoyê. Pêvajo kar û barên giran têxe ser milê me tevan. Hevalan hemûyan pir silav dikirin. Hêviya me ew e ku em bi gelê xwe re rojên xweş û baş bijîn.”
Piştî axaftina Mehmet Polat girseyê li çepikan da, lîland û dirûşma “Bijî berxwedana zindanan” berz kir.
Mehmet Polat di Hezîrana 1996an de li Bedlisê hate binçavkirin. Piştî ku 38 rojan di binçavan de hate îşkencekirin ew sewqî Dadgeha Ewlehiyê ya Dewletê (DGM) ya Hejmara 3yan a Amedê hate kirin. Dadgehê bi sûcên cuda cezayê muebedê lê birî û ew şand girtîgehê. Mehmet Polat bi rêzê li Girtîgehên Dîlok, Kirikkale, Şirnex, Tîpa D a Amedê û Girtîgeha Ewlehiya Bilind a Hejmara 1an a Amedê hate ragirtin.
