Stenbol – Rêveberiya Girtîgeha Bakirkoyê bi sedema ‘silav dane girtiyan’, mehekê hevdîtinê li Ferhat Yildiz, Fînce Akman û Firat Kaya qedexe kir. Ferhat Yildiz û Fînce Akman ên ceza li wan hatiye birîn gotin: “Girtiyên din jî wekî xizmên me ne. Çiqas ceza bidin me jî em ê her tim silav bidin hevdû.”
Ferhat Yildiz, Fînce Akman û Firat Kaya di 12ê Gulanê de careke din çûn girtîgehê û xwestin bi xizmên xwe yên li Girtîgeha Jinan a Bakirkoyê tên ragirtin, hevdîtinê pêk bînin. Lê belê rêveberiya girtîgehê hevdîtina wan qedexe kir. Ferhat Yildiz, Fînce Akman û Firat Kaya bi ser vê yekê serî li rêveberiya girtîgehê dan. Rêveberiya girtîgehê diyar kir ku ji ber ew di hevdîtina hefteya borî de silav dane girtiyên din, hevdîtina wan heta mehekî hatiye qedexekirin.
Hatîce Yildiz a ev du sal e bi hinceta “pere ji girtiyan re şandiye” li Girtîgeha Jinan a Bakirkoyê tê ragirtin. Mizgîn Akman jî ev salek û 3 meh e girtî ye. Kurê Hatîce Yildizê, Ferhat Yildiz û Dayika Mizgîn Akmanê Fînce Akman têkildarî biryara girtîgehê ya qedexekirinê ji ajansa me re axivîn.
‘Girtiyên din jî wekî xizmên me ne’
Ferhat Yildiz diyar kir ku ew ji ber qedexeyê 12ê Gulanê nekarîne hevdîtinê bi xizmên xwe re pêk bînin û got: “Dayika min Hatîce Yildiz ev du sal in li Girtîgeha Bakirkoyê tê ragirtin. Dayika min bi hincetê ‘ji girtiyan re pere şandiye’ 4 sal cêza lê birîn. Di 12ê Gulanê de ji bo hevdîtinê em çûn girtigehê lê gardiyanan ji me re gotin ‘hûn nikarin bikevin cihê hevdîtine’. Ji Firat Kaya, Fînce Akman û ji min re hevdîtinê qedexe kirine. Sedema qedexeyê jî ev e ku hefteya borî piştî hevdîtinê em çûn maseyên din û me silav daye girtiyên din û em bi wan re axivîne. Bi vê hincetê re hevdîtinên me mehekê hatiye qedexekirin. Me li wir bertek xwe bi gotina ‘Em vê biryarê qebûl nakin. Girtiyên din jî wekî xizmên me ne. Me jî ji bo vê yekê rewşa wan pirsî’ nîşan da.”
‘Çiqas ceza bidin em ê her tim silav bidin hevdû’
Fînce Akmanê diyar kir ku bi ser berteka wan nîşan daye gardiyanan gotiye ku ji ber silavdayînê hevdîtin mehekê li wan hatiye qedexekirin û axaftina xwe wiha domand: “Em di eywanê de bi girtiyên din re nêzî hev in. Mase nêzî hev in. Dema ku em derbas dibin silav didin hevdû û dibêjin ‘Hûn çawanin’. Silavdayîna me, gotina me ya ‘Hûn çawanin’ kirin hinceta qedexekirina hevdîtinê. Tevahiya girtiyan, xizmên me ne. Hefteya borî gardiyan di hevdîtinê de li ser serê me digeriyan. Me fêm kiribû ku ew ê tiştekî bikin. Niha em ê çawa ji gotina ‘aştiyê’ bawer bikin. Ji me re dibêjin silav nedin hevdû. Ev ne pirsgirêkên biçûk in, em van tiştan qebûl nakin. Çiqas ceza bidin me jî, em ê her tim silav bidin hevdû.”
