Cagirê Hemserekanê Pêroyî yê DEM Partî Mahfuz Guleryuzî dîyar kerd ke seba proses nêkewo tehlukeyê xetimîyayîşî, ganî no qonaxo ke est o bêro derbaskerdene û qanûnê muhîmî bêrê viraştene. Mahfuz Guleryuzî da zanayene ke ê do heme şaristananê Vakurê Kurdîstan û Tirkîya de qadan de bê û veng da şarî ke tewrê rayîrşîyayîşê “Gamêk seba aştî” yê 16ê Gulane bibê.
DEM Partî, çarçewaya prosesê Aştî û Komelê Demokratîk de seba gameeştişê dewlete û viraştişê qanûnan dest bi çalakîya “Gamêk seba aştî” keno. DEM Partî seba waştişê şarî bi ca bêrê û averşîyayîşê prosesê qanûnê muhîmî bêrê viraştene, şaristananê Vakurê Kurdîstan û Tirkîya de seba tewrbîyayîşê şarî û proseso hempar ê waştişê şaran do bi rayîrê çalakîyan waran de bêrê dîyarkerdene. Cagirê Hemserekanê Pêroyî yê DEM Partî Mahfuz Guleryuzî derheqê nê babetan de ajansê ma rê qisey kerd.
‘Rayîrşîyayîşê ‘Gamêk seba aştî’ yenê viraştene’
Mahfuz Guleryuz derheqê rayîrşîyayîşê ke çarçewaya “Gamêk seba aştî” bêrê viraştene de qisey kerd û wina vat: “Birêz Abdullah Ocalan wexto ke proses da dest pêkerdene rexistinanê sîyasetê demokratîk û raya pêroyî rê mesaj erşawit. Birêz Ocalan dîyar kerd ke heta nika çi destkewteyê kurdan est ê, heme zî bi xoverdayîş pê ameyê. Ganî ma nê prosesî zî wina bigîrê dest. Eke ma pabeyê gaman vinderê no proses sernêkeweno. Vindertişê dewlete heta nika proses bi gamanê esasî rayra nêberdo. Hema zî gamêka şênber seba vetişê qanûnan nêeşta. Wazenê no proses derg bo bê eştişê gaman wina dewam bikero. La gureyê sîyaseto demokratîk o yo ke gureyê xo yê muzekkere û tekoşînî bi ca bîyaro. Ma mecbûrê goreyê naye têbigêrê, bê xoverdayîş no proses nêreseno netîce. Naye ra çalakîya ma ya 16ê gulane seba eştişê gaman o. Wext nêmend, sebrê şarî nêmend, sebrê ma nêmend.”
‘Heme Şaristananê Kurdîstan û Tirkîya de vejîyenê waran’
Mahfuz Guleryuz dîyar kerd ke şaristanê Vakurê Kurdîstanî û Tirkîya de bi tewrbîyayîşêke xurt do çalakîyanê rayîrşîyayîşî virazê û wina dewam kerd: “Ganî şarê ma bi hawayêko xurt tewrê çalakî bibo. Çalakî do heme şaristananê Vakurê Kurdîstanî û Tirkîya de eynî wextî bêrê viraştene. A roje ganî heme aştîperwerî vejîyê waran û waştişê xo bîyarê ziwan. Heme dînamîk û temsîlîyetê komelî bi rengê xo tewrê çalakîyan bibê. Heme şarê ma, sazgeh û dezgeyê demokratîkî, partîyê sosyalîst, kesê dînî, sazgehê cinîyan û xozaperestan dawetê nê çalakîyan kenê. Dayîkanê Aştî partîyanê sîyasî reyde pêvînayîşî pê ardî. No netîceyêke baş bî. Ganî bi nê ruhî serê de Dayîkê Aştî û heme cinî nê çalakîyan rê pêşengî bikerê.”
‘Kongreya ma kongreya xo newe ra sazkerdişî ya’
Mahfuz Guleryuz derheqê amadekarîya kongre de dîyar kerd ke seba kongre dest bi kombîyayîşan kerdo û wina qisey vat: “Kongreya ma kongreya xo newe ra sazkerdişî ya. Bi her hawayê, seba ke cewabê prosesî bido kongreyêka newe ra awankerdişî ya. No proses seba şarê kurdî û Rojhelatê Mîyanên prosesêko newe yo.Tesîrê xo serê temamê herême de keno. Seba sîyaseto demokratîk hewceyî metodanê xo de newe ra sazkerdiş est o. Ma hem rêxistine û hem zî şarê xo reyde mîyanê dayîşûgirewtişî de yê. Seba aye prosesêko muhîm vernîya ma de yo. Ma wazenê her kesî reyde munaqeşe bikerê. Eke vurîyayîş bibo serê esasî de do bibo. Prosesêko ma tedeyê qedera şarê kurdî eleqedar keno. Eynî wextî de ma do xebatanê xo seba Aştî û Komelê Demokratîk zî dewam bikerê. Seke birêz Ocalan zî vat nika ra tepîya zî çi destkewteyê ma virazîyê do bi xoverdayîş virazîyê. Seba ey nuqtaya tewr muhîme meseleya xoverdayîşî ya. Bê xoverdayîş no proses nêşino sere û sîyaseto demokratîk aver nêşino. Tarîxê kongre zelal nîyo, la îhtîmal est o ke ma 20ê îlonî de virazê. Ma seba ca muracatê salonê kerdo. Ma do qezayan de bi konferansan dest bi xebata kongre bikerê. Dimayê konferansê şaristan û herêman ra ma do yê merkezî virazê. Badê ke rexne û pêşnîyarî zelal bibê konferasê merkezî de do qeraran bigîrê û nê qeraran ser o şorê kongre. Seba nê xebatan do komîsyonî bêrê awankerdene û hedî hedî xebatê ma dest pêkenê.”
