Amed – Di lêpirsîna Gulîstan Dokuyê de her çiqas waliyê Dêrsimê yê berê Tuncay Sonel îdia kiribû ku ew ji bo cihê Gulîstan Dokuyê hîn bibe qertê sîmê yê telefona wê şandiye. Hat zanîn ku cihê Gulîstan Dokuyê di 7ê Çileya 2020an de hatiye tespîtkirin û ketiye dosyayê. Bi vê delîla şênber îdiaya waliyê berê Tuncay Sonel pûç bû.
Xwendekara pola duyemîn a Zaningeha Mûnzûrê ya Dêrsîmê Gulîstan Doku di 1ê Çileya 2020an winda bû. Tevî parêzer û malbatê, gelek rêxistinên jinan li her deverê Tirkiyeyê û bakurê Kurdistanê aqûbeta Gulîstan Dokuyê pirsîn. Piştî 6 salan di 13 nîsanê de ji bo pirsîna aqûbeta Gulîstan Dokuyê operasyona binçavkirinê hate destpêkirin. Têkildarî mijarê heya niha 15 kes hatin binçavkirin, ji wan 12 kes hatin girtin û şandin girtîgehê.
Derket holê ku Waliyê Dêrsimê yê wê demê Tuncay Sonel têkildarî bûyerê delîlên hatine komkirin winda kiriye. Tuncal Sonel her çiqas vê yekê qebûl neke jî, her roj bi belgeyên derdikeve holê îdiaya Tuncay Sonel pûç dikin.
Tuncay Sonel li Xarpêtê hate binçavkirin û ew birin Erzorimê. Dema hatiye binçavkirin nasnameyek sixte li ser Tunay Sonel bûye. Hat zanîn ku di îfadeya ku dabû Serdozgeriya Erzorimê de gelek nakokî hebûn û gelek idia jî qebûl nekiribûn. Derket holê ku Tuncey Sonel qerta sîmê a telefona Gulîstan Dokuyê daye polîsên berê Gokhan Ertok ê bi çeteyên sîberê re dixebite. Beriya niha jî Jinnewsê nûçeyên derbarê bûyerê parve kiribûn û îdiayên Tuncay Sonel pûç kiribûn. Delîlên derketine holê jî ev nûçe piştrast kirin.
