Li Dêra Surp Gîragosê ya Ermenan a Amedê Cejna Paskalyayê hate pîrozkirin. Di ayînê de peyamên aştiyê û jiyana hevpar a gelan derketin pêş.
Li Amedê ku malovaniya bawerî û çandên cuda dike, îro li Dêra Surp Giragosê ya Ermenan ji bo cejna Paskalyayê merasîmeke olî hate lidarxistin. Di ayîna ku ji aliyê rûspiyên dêrê ve hate birêvebirin de, peyamên aştiyê û jiyana hevpar a gelan derketin pêş.
Merasîm bi kincên olî yên taybet û bi rîtuelên dîrokî dest pê kir. Tevî civata Ermen a li bajêr, rêveber û endamên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) jî beşdarî merasîmê bûn. Şandeyên partiyan bi daxuyaniyên xwe bal kişandin ser girîngiya parastina mozaîka çandî ya Amedê û cejna Paskalyayê li civata Ermen pîroz kirin.
Piştî merasîma olî, li hewşa dêrê li gorî kevneşopiyê hêkên rengîn hatin belavkirin. Beşdarên ku kêfxweşiya xwe ya ji bo pîrozkirina vê rojê li dêra dîrokî anîn ziman, destnîşankirin ku zindîkirina van rîtuelan li gel nûnerên siyasî û saziyên sivîl, hêviyên ji bo aştiyê xurttir dike. Merasîm, piştî duayan bi pêxistina mûman bi dawî bû.
