Êlih – Welatiyên ku li navçeya Kercewsê ya Êlihê tev li Newrozê bûn diyar kirin ku Newroz ji bo Kurdan rojeke nû ye û destpêka serî rakirina li dijî zilma Dehaqan e.
Cejna Newrozê bi rojane li gelek tax, gund, navçe û bajarên Kurdistanê û Tirkiyeyê tê pîrozkirin. Yek ji van cihan jî navçeya Kercewsê ya Êlihê bû. Di Newroza Kercewsê de jî gelek kes kom bûn û bi awayekî keyfxweşî govend gerandin û Newroza xwe pîroz kirin.
Welatiyên navçeyê yên ku li qadê bûn, ji ajansa me re axivîn û diyar kirin ku Newroz ji bo wan tê maneya rojeke nû û gotin: “Kawayê Hesinkar di Newrozê de li dijî Dehaqê xwînmij serî hildaye û bûye serfiraziya gelê Kurd. Ji bo gelê Kurd ew roj rojeke gelek bi qîmet e.”
‘Hêvî dikin ku Newroz aştî û azadiyê bi xwe re bîne’
Yek ji welatiyan Ozlem Konak a qala girîngiya Newrozê kir wiha got: “Newroz beriya her tiştî aştiye, ji bo gelê me rojeke gelek pîroz û girîng e. Ev bi hezar salan e, Newroz li vî welatî tê pîrozkirin. Yanî tê wateya kesên ku bindest bigihin azadiya xwe. Em Newrozê ji bo hemû gelê Kurd pîroz dikin û em hêvî dikin ku aştî, azadî, xweşî û wekheviyê bi xwe re bîne. Newroz îro ji berê mezintir bûye. Yên berê jî gelekî xweş bûn, lê niha hê bêhtir gel hişyar bûye û wateya wê fêm dike.”
‘Ew roj rojeke gelek bi qîmet e’
Welatiyê bi navê Mehmet Nûrî Aslan jî anî ziman ku Newroz tê wateya roja nû û wiha got: “21 Adarê ji bo gelê me yê Kurd û ji bo azadiya gelên Rojhilata Navîn gelek girîng e. Kawayê Hesinkar di Newrozê de li dijî Dehaqê xwînmij serî hildaye û bûye serfiraziya gelê Kurd. Ji bo gelê Kurd ew roj rojeke gelek bi qîmet e. Ev pêvajoya ku birêz Abdullah Ocalan bi dewleta Tirk re daye destpêkirin dê gelek tiştên baş bi xwe re bîne. Û ji bo anîna xweşiyê re hinek dem dixwaze. Ev şer di rojekê de dest pê nekiriye, ku ev doz jî di rojekê de biqede.”
‘Newroz ji bo serîrakirina li dijî Dehaqan rojeke pîroz e’
Pişt re welatiya bi navê Gokçe Îdîg jî wiha got: “Newroz ji ber serîrakirina li dijî Dehaqan rojeke pîroz e. Bi taybetî jî bi destpêka hatina biharê re her tim tê pîrozkirin. Demên berê her tim pîroz kirinên Newrozê bi kotekî û bi qedexeyan dihate pîrozkirin. Kes ji tirsa newêribûn bên Newrozê pîroz bikin. Niha li gora wan deman baş e û girseya niha jî xurt tir e.”
‘Newroz ji bo Kurdan rojeke nû ye’
Herî dawî welatiyê bi navê Yilmaz Aslan jî ev tişt got: “Newroz ji bo Kurdan rojeke nû ye. Em hêvî dikin Newroza 2026an bibe sedema azadî, aştî û aramiya welatê me. Niha em di merheleyeke baş de ne, ew jî bi saya şehîdên me ye. Beriya 34 salan li Kercewsê du hevalên me di Newrozê ketin kemînê hat şêhîd xistin. Em wan bi rêzarî û bi minet bi bîr tînin. Em bi saya xwîna wan li van qadan Newrozê bi rihetî pîroz dikin.”
