Berdevka Meclîsa Jinan a DBPê Bêrîvan Bahçecî di bernameya 8ê Adarê de axivî û diyar kir ku berxwedana jinên Kurd bi saya nêrînên Rêberê Gelê Kurd Abdullah Ocalan geş dibe.
Bi pêşengiya Tevgera Jinên Azad (TJA), jinan li Mûşê bi şiara “Bi berxwedanê azad dibin, civaka demokratîk dihonin” li binê Fîdanliqa Yeşilceyê kom bûn û demeke dirêj bi tilîliyan govend gerandin. Piştî govendê, jin bi erbaneyan û bi dirûşmên “Jin, jiyan, azadî”, “Bijî berxwedana jinan”, “Bijî têkoşîna jinan” ber bi taxa Yeşîlyurtê ve dest bi meşê kirin. Di meşê de pankarta “Em bi berxwedanê azad dibin, civaka demokratîk dihonin” û dowîzên “Yek gotin yek çalakî: Jin, jiyan, azadî”, “Jinên azad, civaka azad”, “Kezîyê keça Kurd sembola azadiyê ye” hatin hildan. Jin bi kincên xwe yên herêmî, fularên mor û rozetên 8ê Adarê beşdarî meşê bûn.
‘Pêşengên temînata aştiyê jin in’
Parlamentera DEM Partiyê ya Mûşê Sumeyye Bozê di bernameyê de axivî û got: “Çawa ku pêşengên aştiyeke birûmet di Pêvajoya Civaka Demokratîk de jin in, di têkoşîn û temînata aştiyê de jî pêşeng jin in. Heke îro muzakereyên aştiyê tên axaftin, dirûşma me jî dê bibe ‘Îro dema jinê ye’. Heke îro jin li kolanan bi dirûşma ‘Jin, jiyan, azadî’ dimeşin û destkeftiyan bi dest dixin, ev bi saya têkoşîna azadiyê ya jinên Kurd e.”
‘Heta jin azad nebe civak azad nabe’
Berdevka Meclîsa Jinan a DBPê Berîvan Bahçecî jî bal kişand ser dîroka 8ê Adarê û diyar kir ku felsefeya “Jin, jiyan, azadî” li tevahiya cîhanê belav bûye. Berîvan Bahçecî wiha berdewam kir: “Wekî jin, em dengê xwe li dijî qetilkirina jinan bilind dikin. Bila ev hişmendiya mêr-serwer baş bizanibe ku berxwedana jinan dê bidome.”
Berîvan Bahçecî gotina Abdullah Ocalan a “Heta jin azad nebe, civak jî azad nabe” bi bîr xist û destnîşan kir ku berxwedana jinên Kurd bi saya nêrînên wî geş bûye.
Piştî axaftinan, jinan li ber erbaneyan govend gerandin û çalakî bi dawî bû.
