Hevberdevka Meclisa Jinan a DEM Partiyê Halîde Turkoglû ya di meşa bi boneya 8ê Adarê de hate lidarxistin de axivî destnîşan kir ku ji bo jiyaneke wekhev, azad têdikoşin. Hevberdevka HDKê Meral Daniş Beştaş jî diyar kir ku jin roj bi roj têkoşîna xwe bi pêş dixin û xwest jin li dijî komkujiyan dengê xwe bilind bikin.
Di pêşengtiya Meclisa Jinan Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) de bi boneya 8ê Adarê Roja Jinan a Cîhanê ji ber avahiya DEM Partiyê ya Sêrtê heta Cadeya Guresê meşek hate lidarxistin. Meş bi dirûşma “Em bi serhildana xwe berxwedanê, bi berxwedanê jiyana azad û wekhev dihûnin” hate lidarxistin. Hevberdevka Kongreya Demokratîk a Gelan (HDK) Meral Danış Beştaş, Berdevka Meclîsa Jinan a DEM Partiyê Halîde Turkoglû û parlamentera bajêr Sabahat Erdogan Saritaş û gelek jin beşdarî meşê bûn.
Jinên ku li ber avahiya partiyê kom bûn li vir demekî dirêj stran gotin û li ber stranan govend gerandin. Jinên ku bi dowîzên “Jin jiyan azadî” , “Em li dijî tundiya dewlet-mêr bêdeng nabin” û “Peymana Stenbolê dide jiyîn” û wêneyên jinên hatine kuştin dest bi meşê kirin di meşê de dirûşmên “Bijî Serok Apo” , “Jin jiyan azadî, azad bike Rêbertî” , “Bijî berxwedana jinan” , “Bijî berxwedana Rojava” , “Mêr dikuje dewlet diparêze” berz kirin. Jinên ku cil û bergên xwe yên Kurdî li xwe kirin, şalen mor avêtin stûyê xwe û bi dirûşm, çepik û tilîliyan gihiştin Cadeya Guresê.
Jinên ku li vir jî demekî dirêj stran gotin û govend gerandin daxuyanî dan. Hevseroka DEM Partiyê ya Sêrtê Rewşan Arslan a ewilî axivî, roja jinan li hemû jinan pîroz kir û got: “Heta ku jin azad nebin civak nikare azad bibe.” Dû re Parlamentera DEM Partiyê ya Sêrtê Sabahat Erdogan Saritaş axivî û çar aliyên Kurdistanê silav kir û roja jinan pîroz kir.
‘Em ji bo jiyaneke wekhev û azad têdikoşin’
Halîde Turkoglû jî bi pîrozkirina roja jinan dest bi axaftina xwe kir û wiha got: “Weke jinên ku dibin hedefa tundiyê; Em ê li her derê daxwazên xwe yên wekhevî, azadî û aştiyê bidomînin. Têkoşîna 8ê Adarê têkoşîneke ku jinan li seranserê cîhanê tîne cem hev. Em jin bi daxwazên xwe yên herî mafdar li qadan e. Em ji bo jiyaneke wekhev û azad têdikoşin. Îro ev têkoşîn li her derê cîhanê bilind dibe. Ev deng ewqas mezin ku di şeran de bedena jinan hedef tê girtin. Tundiya li dijî jinan îro roj bi roj zêde dibe. Heke îro mêr kuştina jinekê ji xwe re weke mafekê bibîne ev têkildarî feraseta desthilatê ye. Em jin di 8ê Adarê de li dijî tundiya li ser jinan serî hildidin. Têkoşîna me ya wekheviyê bilind dibe. Ji ber ku li cihê ku wekhevî lê nebe tundî heye. Em jin li dijî vê pergala mêrsalar dibêjin ku ‘Hûn dikarin li Rojhilata Navîn tarîtiyê belav bikin, bi şeran îradeya gelan xesp bikin, jinan qir bikin lê me li Rojhilata Navîn, li Rojava hêza xwe ji jinên ku li Rojava li ber xwe didin girtiye. Şoreşa Jinan a Rojava li dijî pergala tarî ya li Rojhilata Navîn serhildan e. Em vê serhildanê silav dikin. Em ê xwedî li vê têkoşînê derkevin.”
Halîde Turkoglû anî ziman ku bi jinên ku li îran û Rojhilat bi felsefeya “Jin jiyan azadî” têkoşin û jinên Efxanistanî re di nava piştevaniyê de ne û wiha domand: “Em li hemberî pergala serdest a mêran bîat nakin. Em hemû jinên cîhanê silav dikin. Ev 8ê Adarê ji bo me roja berxwedanê ye û di heman demê de rojeke ku jin daxwazên xwe yên azadî, wekhevî û aştiyê tînin ziman e.”
‘Jin dê têkoşîna xwe ya jinan û azadiyê bilind bikin’
Halîde Turkoglu bal kişand ser pêvajoya “Aştî û Civaka Demokratîk” û wiha axaftina xwe wiha bi dawî kir: “Pêvajoya ku Birêz Ocalan bi banga xwe dest pê kir, bangewaziyek e ku em jin jî li dora wê bûne xelek e. Ji ber ku çawa ev pergal Kurdan û karkeran înkar dikin; ew jinan jî înkar dike. Îro, têkoşîna aştiyê; Têkoşîna jinan a ji bo aştî û wekheviyê ye. Felsefeya ‘jin, jiyan, azadiyê’ ev yek fêrî me kir. Mezinkirina vê têkoşînê wê derfetê bide jinan ku têkoşîna xwe ya jiyan û azadiyê bilind bikin.”
‘Em jin divê pêşengtiya vê pêvajoyê bikin’
Hevberdevka HDKê Meral Daniş Beştaşê jî 8ê Adarê li jinan pîroz kir. Meral Daniş Beştaş diyar kir ku jin roj bi roj têkoşîna xwe bi pêş dixin û wiha got: “Li Rojhilata Navîn şerên mezin hene. Şerê Cîhanê yê 3yemîn li herêma Kurdistanê diqewime. Li ku derê şer hebe, dijminatiya Kurdan teqez tê nîşandan. Ji ber vê yekê, têkoşîna me jinan di serî de ji bo hebûna me ye. Em li dijî hemû nijadperestiyê têkoşîneke mezin dimeşînin. Wek jin, em di ziman, nasname û mafên xwe yên neteweyî de pêşengtiyê dikin. Em ê tu carî dev ji van mafan bernedin. Têkoşîna me jî ji bo mafên jinan e. Em dibêjin jin pêşengên Pêvajoya Aştî û Civaka Demokratîk in. Ev pêvajo ji bo hemû gelan rêyeke pîroz e. Îro birêz Ocalan di vî warî de xebateke berfireh dimeşîne. Em dizanin ku ew 27 sal in ji bo gelê Kurd azad bijî li Girava Îmraliyê çi têkoşîneke mezin dimeşîne. Ji ber vê yekê divê jin pêşengtiya vê pêvajoyê bikin. Em berpirsyariya xwe dizanin û em ê pêşengtiyê bikin.”
Meral Daniş Beştaş diyar kir ku di rojê de 3 jin ji aliyê mêran ve tên kuştin û anî ziman ku divê jin li dijî van komkujiyan dengê xwe bilind bikin. Meral Daniş Beştaş diyar kir ku 8ê Adarê ji ber vê yekê girîng e û axaftina xwe wiha bi dawî kir: “Bila 8ê Adarê pîroz be, bila meş, têkoşîn û keda jinan pîroz be.”
Piştî axaftinan dirûşma “Jin jiyan azadî” hate berzkirin. Meş bi çepik û tilîliyan bi dawî bû.
