Parlamenterê DEM Partî Abdullah Gungenî derheqê prosesê “Aştî û Komelê Demokratîkî” de ke yew serre xo dima verdaya, qisey kerd û vat ke ganî dewlete êdî gamanê şênberan bierza.
Gungenî vat: “Nêzdîbîyayîş û vatişê Dewlet Bahçelîyî seba prosesî xora biqîmet ê. La tena vatiş bes nîyo, ganî pratîk de gamê şênberî bibê. Heta ke dewlete ziwan û sîyasetê xo nêvurno çîyêk do aver nêşêro. Sey serrêk o ke meseleya kurdan sey meseleya emnîyetî gênê xo dest, eke nêzdîbîyayîş wina bo çareserî nêyena.”
Gungenî dîyar kerd ke ganî dewlete ferasetê xo bivurno û vat: “Kurdan komare ra ver zî nê herranê xo de bîyê. Ganî dewlete nê prosesî de na raştîye esas bigîro.”
Gungenî bale ante raporê Komîsyonê Meclîsî ser o û vat: “Mîyanê raporî de zaf kêmanîyî est ê la nê kêmanî nêvanê ke ma fek heme babetan ra verdê. Ganî mesele fina Meclîs de bêro qiseykerdene. Seke Rayber Apo zî vano çiqas ke rapor kêmî bo zî no destpêkêko newe yo. La çareserkerdişê meseleyan asan nîyo, biney wext zî hewce keno.”
Gungenî peynî de vat: “Bêbawerîya komelî eşkera ya çunke hîna zî ziwan nêvurîyayo û çapemenîya dewlete bi ziwanêko tûj û neyinî qisey kena. Bi serran o ke komelê kurdan Têgêrayîşê Azadîye reyde zaf prosesê sey naye vîyarnayî, coka komel zano û bêbawerîya ci zî zanayîşê ci ra yena.”
