Kongra Star bernameya 8ê Adarê Roja Jinan a Cîhanê bernameya bajarên Amûdê, Qamişlo, Tirbespiyê, Çilaxa, Girkê Legê û Dêrikê bi daxuyaniyekê par vekir. Di daxuyaniyê de hate destnîşan kirin ku jin dê hêz, nasname, ziman û axê biparezin.
Kongra Star bi daxuyaniyekê hûrgiliyên çalakiyên ku dê ji 1ê Adarê heta 8ê Adarê bi boneya Roja Jinan a Cîhanê li 6 bajaran bên lidarxistin, eşkere kir. Daxuyanî li Stadyuma Şehîdên 12ê Adarê ya Qamişloyê ji aliyê berdevka Kongra Star a Qamişloyê ve hate xwendin. Di daxuyaniyê de hate destnîşankirin ku bi felsefeya “Jin, Jiyan, Azadî” jin dê destkeftiyên şoreşê biparêzin. Di peyamê de hate gotin ku 8ê Adarê ne tenê roja şahiyê ye, lê roja teqezandinê, bilindkirina asta rêxistinê û berxwedana li hember zihniyetên ku dijminatiya nasnameya jina azad dikin e.
‘Jin dê ziman û axê biparêzin’
Kongra Star di daxuyaniyê de bîranîna şehîdan, di serî de Denîz Çiya, Feraşîn û Rojbîn û tevahî şehîdên têkoşîna jinan kir û diyar kir ku jin dê rêya berxwedanê bidomînin. Her wiha hate diyarkirin ku jin bi fedekariyên xwe civak ber bi azadiyê ve birine û ji bo aştiyê û demokrasiyê roleke bingehîn girtine. Di daxuyaniyê de hate ragihandin ku, tevî êrişên ku li dijî jinan, nasname û çanda wan tên kirin, jin dê bi ruhê Şoreşa Jin berxwedanê bidomînin û destkeftiyên şoreşê biparêzin. Kongra Star bal kişand ku jin dê li hember kujerên jinan û civakê bibin mertalên berxwedêr û ax, ziman, nasname û rûmeta xwe biparêzin.
Kongra Star ragihand ku çalakî li bajarên Amûdê, Qamişlo, Tirbespiyê, Çilaxa, Girkê Legê û Dêrikê dê bên lidarxistin.
Bernameya çalakiyên 6 bajaran wiha ye;
1ê Adarê: Bajar, rê û kolan dê bi destê jinan bên xemilandin û kezîyek 100 metre were hûnandin. Li Qamişloyê bi pêşengiya Tevgera Çanda Hîlala Zêrîn çalakiyên hunerî dê li Navenda Mihemed Şêxo bên lidarxistin.
2yê Adarê: Li Tirbespiyê civîna jinan dê bê lidarxistin. Li Qamişloyê rêzesemîner û sinevîzyon dê bi pêşengiya Tevgera Jinên Ciwan bê lidarxistin. Li Çilaxayê pankartên bi dest hatine xêzkirin dê bên daliqandin.
3yê Adarê: Li piraniya bajaran dê semîner bên çêkirin û serdana malbatan bê kirin.
4ê Adarê: Li Amûdê civîna jinan bê lidarxistin. Jinên ciwan û Kongra Star bi hev re serdana gundê Jinwar bikin. Li Qamişloyê semînerên parastinê li du cihan bên lidarxistin. Serdana malbatan bidome û bi şev serdana bendên parastinê bê kirin. Her wiha balonên ku li ser wan “Jin, Jiyan, Azadî” hatiye nivîsandin bên berdan ezmanan.
5ê Adarê: Li Dêrikê dê meşa bi meşaleyan bê lidarxistin û filmek bê pêşandan. Li Girkê Legê ji bo kedkarên jin dê gul werin dayîn. Li Tirbespiyê civînek dê bê lidarxistin. Li Qamişloyê meşa bi meşaleyan û li Amûdê semîner dê bên dayîn.
6ê Adarê: Li Dêrikê bi pêşengiya jinên ciwan çalakiyek dê bê lidarxistin û bi zarokan re balon bên firandin.
7ê Adarê: Li hemû pakrewangehên şehîdan bi malbatên wan re mûm dê bên vêxistin. Li Çilaxayê gul dê li jinan werin belavkirin. Li Girkê Legê meşa bi meşaleyan dê bê lidarxistin. Li Amûdê dê daxuyanî bê dayîn û kezî bê hûnandin.
8ê Adarê: Li Qamişlo û Dêrikê dê du şahîyên mezin bên lidarxistin.
