13emîn Xelatên Pêşbaziya Helbestê ya Arjen Arî li Amedê hate dayîn û bi pêşengtiya Komeleya Wêjekarên Kurd Arjen Arî di salvegera koça dawî de ew bi panelekê bibîr anî.
Ji bo vejandina bîranîn û navê Arjen Arî, yek ji navên girîng ên helbesta nûjen ê Kurdî û teşwîqkirina helbestvanên ciwan ên Kurd bo helbestê, îsal merasîma xelatdayîna Pêşbaziya Helbestê ya Arjen Arî ya 13emîn, li Salona Xwendinê ya Arjen Arî ya Şaredariya Peyasê hate lidarxistin. Hevşaredarê Peyasê ya Amedê Cengîz Dundar, malbata Arjen Arî, nunerên saziyên sivîl, nivîskar û gelek kes tevlî bernameyê bûn.
Di berdewamiya bernameyê de xelatên Hoşeng Nizarî û Simeya H. Lalîn, ku bi du dosyeyên cuda bûne yekem û Michael L. Chyet, xwediyê Xelata Rûmetê hate dayîn. Di çarçoveya bernameyê de bi pêşengtiya Komeleya Wêjekarên Kurd panela ku moderatoriya wê Mîna Acer dikir bi tevlîbûna niviskar û helbestvan Osman Ozçelîk û Rêzan Diljen li ser Arjen Arî jî hat lidarxistin. Bername piştî panelê bi dawî bû.
Osman Ozçelîk ku hevalê Arjen Arî ye di panelê de da zanîn kû ew bi hevre gelek wext derbaskirine û bi vê yekê ew gelek bexteware kû bi Arjen Arî re hevaltî kiriye û li ser nivîskariya Arjen Arî axivî û çend helbestên wî xwend.
Rêzan Diljen jî li ser naskirina wî ya bi Arjen Arî û hevpeyvîn û zimanê helbestê yê Arjen Arî axivî û ji çend nivîs û helbestên Arjen Arî mînak da û axaftina xwe bi wî awayî bi dawî kir.
