Qamişlo – Xwendekarên Beşa Hunerên Bedew a Zanîngeha Rojava derbarê hewldanên ku zanîngeha wan daxilî Zanîngeha Firatê bê kirin axivîn û diyar kirin ku zanîngeha wan xwedî taybetmendiyeke xweser e û ew ê dev ji perwerdehiya bi zimanê dayikê bernedin.
Li Rojavayê Kurdistanê nîqaş û nerazîbûnên li dijî hewldanên entegrekirina Zanîngeha Rojava ya bi Zanîngeha Firatê re berdewam dikin. Duh xwendekarên zanîngehê bi hatina komîteya entegrasyonê ya zanîngehê re dest bi xwepêşandana kir û nerazîbûn nîşan dan. Têkildarî vê mijarê xwendekarên Beşa Hunerên Bedew a Zanîngeha Rojava ji ajansa me re axivîn.
‘Em dixwazin bi zimanê xwe xwendina xwe bidomînin’
Xwendekara Beşa Peykersaziyê Esma Hilwoy diyar kir ku ew bi berhemên ku diafirînin hest û ramanên civakê didin der û got: “Em bi rêya wan peykerên ku çêdikin hest û ramanên civakê didin xuyakirin. Em dixwazin ev xebat bêtir werin pêşxistin û pîrozkirin. Ez entegrasyona Zanîngeha Rojava ya bi Zanîngeha Firatê re qebûl nakim. Em dixwazin her kes li cihê xwe bimîne û bi zimanê xwe xwendina xwe bike. Ev 10-12 sal in ez bi zimanê xwe perwerdehiyê dibînim. Ger ez niha biçim bi zimanê Erebî bixwînim, ev ji bo me gelekî zehmet e. Em dixwazin li cihê xwe bin û bi zimanê xwe perwerdehiya xwe bibînin.”
‘Ziman nasname û hebûn e’
Xwendekara Beşa Hunerên Bedew Îman Îbrahîm jî destnîşan kir ku ew gelekî kêfxweş e ku bi zimanê xwe yê dayikê perwerdehiyê dibîne û wiha axivî: “Min tabloyek li ser folklora Kurdî çêkiriye û ez karê xwe hez dikim.Em naxwazin ji bilî zimanê xwe bi zimanekî din perwerdehiyê bibînin. Ji ber ku ziman nasname û hebûn e û em naxwazin zimanê me were windakirin.”
‘Zanîngeha Rojava xwedî taybetmendiyeke xweser e’
Xwendekarê bi navê Bilind Omer Omer jî bi lêv kir ku ew li ser wêneyên portreyan dixebite û ev yek anî ziman: “Dema ez vî karî dikim pir kêfxweş dibim. Çêkirina portreyan hestekî pir xweş dide mirov. Em hemû bi kêf û eşq hatine beşa hunerê. Hefteyê 3 saet ders ji bo me nayê qebûlkirin, lê em li ber xwe didin û hîn xurtir dibin. Ez entegrebûna Zanîngeha Rojava ya bi Zanîngeha Firatê qebûl nakim. Zanîngeha Rojava bi serê xwe ye û xwedî taybetmendiyeke xweser e; nabe ku em tevlî wan bibin.Divê zimanê me û zanîngeha me wekî xwe bimînin. Em nikarin tev li wan bibin, ji ber ku dê di nav de ziman û çanda me were windakirin.”









