Rojnamevan Huseyîn Denîz li ser gora xwe hate binîranîn. Rojnamevan Gulîstan Gulmuş di bîranînê de axivî û got: “Armanca wî her tim gihandina rastiyê ji bo gelê xwe bû. Em ê jî li ser bingeha armanca wî, gihandina rastiyê ji bo gelê xwe berdewam bikin.”
Li navçeya Serêkaniyê ya Rihayê, rojnamevan Huseyîn Denîz li ser gora xwe hate bîranîn. Nûnerên Komeleya Rojnamevanan a Dîcle Fıratê, DEM Partiyê ya Rihayê, malbata Denîz û gelek welatî beşdarî bîranînê bûn.
‘Gel her tim xwedî li şehîdê xwe derket’
Bîranîn bi rêzgirtinê dest pê kir. Piştî rêzgirtinê xwişka Huseyîn Denîz, Newroz Algaç axivî. Newroz Algaç behsa têkoşîna Huseyîn Denîz kir û got: “Şehîd şehîdê gelê xwe ye. Gel her tim xwedî li şehîdê xwe derket. Mesele ne ew e ku mirov çiqas dijî, mesele ew e ku di jiyana xwe de çiqas kar û tiştên hêja kiriye. Huseyîn Denîz di jiyana xwe ya 36 salan de mamostetî, nivîskarî, bavîtî û zaroktî kir. Kesekî ronakbîr bû. Hêvîdar im em careke din wan rojan nebînin.”
‘Em ê li ser rêya rastiyê bin’
Piştre li ser navê DFGê Rojnamevan Gulistan Gulmuş axivî û wiha got: “Di kesayeta hevalê Huseyîn de em hemû şehîdên Çapemeniya Azad bi rêz û hurmet bi bîr tînin. Îro em ne tenê ji bo bîranînê hatine vir, di heman demê de em hatine spasiya hevalê Huseyîn bikin ku di nav wan kesan de ye ku ev mîras ji me re hiştiye. Armanca wî her tim gihandina rastiyê bo gelê wî bû. Em ê jî li ser bingeha armanca wî, gihandina rastiyê bo gelê xwe berdewam bikin. Şehîd namirin.”
‘Mîrasa berxwedan û têkoşînê berdewam dike’
Di bîranînê de herî dawî Hevseroka DEM Partiyê ya Rihayê Ayşe Surucu axivî û ev tişt anîn ziman: “Di kesayeta Huseyîn Denîz de em kedkarên têkoşîna azadiyê û şehîdên çapemeniya azad bi bîr tînin. Huseyîn Denîz nirxekî vî bajarî û vî welatî bû. Di salên 90î yên tarî de li nîveka kolanê hate kuştin. Kesên ku ji rastiyê ditirsiyan, xwestin pênûsa Huseyîn Denîz bişkînin û wî bêdeng bikin. Di wê serdemê de tevî Huseyîn Denîz bi sedan rojnamvan hatin qetilkirin. Mîrasa berxwedan û têkoşînê ya ku wan hiştiye, îro jî berdewam dike.”
Bîranîn, bi danîna qurnefîlan bi dawî bû.
