Riha – Hûrgiliyên hevdîtina di navbera Heyeta Rojava û Hikûmeta Demkî ya Sûriyeyê de derketin holê. Piştî ku Mezlûm Ebdî ragihand ku hebûna leşkerî ya HSDê bi dawî bûye, derket holê ku Ebdî dê bibe musteşarê Serokkomarê Sûriye û Îlham Ehmed jî dê bibe parlamantera Sûriyeyê. Her wiha hate destnîşankirin ku Kurdî bû zimanê duyemîn ê fermî.
Heyeta Rojavayê Kurdistanê û heyeta Hikûmeta Demkî ya Sûriyeyê di 25ê Tebaxê de civiyan û li ser bend û xalên peymana 29ê Çileyê gotûbêj kirin û axivîn.
Di dawiya civînê de Fermandarê Giştî yê Hêzên Sûriya Demokratîk (HSD) Mezlûm Ebdî li Koşka Gel a Sûriyeyê ragihand ku HSDê xwe fesix kiriye û li ser pêvajoya entegrasyonê xebatên xwe didomînin.
Hûrgiliyên hevdîtina ku beriya du rojan li paytexta Sûriyeyê Şamê di navbera Fermandarê Giştî yê HSDê Mezlûm Ebdî û Hevseroka Daîreya Têkiliyên Derve ya Rêveberiya Xweser Îlham Ehmed û Serokkomarê Demkî yê Sûriyeyê de pêk hatibû, hêdî hêdî derdikevin holê.
Piştî hevdîtinê, Mezlûm Ebdî daxuyaniyek da û ragihand ku wan dawî li hebûna leşkerî ya HSDê aniye. Piştî vê daxuyaniyê, di çapemeniyê de derbarê erka Mezlûm Ebdî û Îlham Ehmed a di hikûmeta navendî de, perwerdehiya bi zimanê dayikê û rewşa YPJê agahiyên girîng cih girtin.
Ebdî dibe musteşar, Ehmed dibe parlamenter
Li gorî çavkaniyên li herêmê ku agahî dan ajansa me; hat piştrastkirin ku Mezlûm Ebdî dê wekî musteşarê Serokkomariya Sûriyeyê bê tayînkirin. Her wiha Îlham Ehmed jî dê ji kotaya Serokkomariyê bibe Parlamentera Meclisa Sûriyeyê û di xebatên dîplomasiyê de bi erk û berpirsiyarî rabe.
Kurdî dibe zimanê duyemîn ê fermî
Di çarçoveya peymanê de zimanê Kurdî li seranserî Sûriyeyê wekî zimanê duyemîn ê fermî hat qebûlkirin. Li herêmên Kurdan dê perwerdehiya bi zimanê dayikê bê birêxistinkirin. Wê di vê çarçoveyê de komîsyonek taybet bê avakirin, materyalên perwerdehiyê yên bi Kurdî amade bike û pergala perwerdehiyê saz bike.
Dê derbarê YPJê de daxuyanî bê dayîn
Mijareke din a girîng a hevdîtinê rewşa leşkerî ya YPJê bû. Hat hînbûn ku di mijara hebûn û siberoja YPJê de jî lihevkirin çêbûye. Tê payîn ku di saetên pêş de di malpera fermî ya YPJê de derbarê mijarê de daxuyaniyeke berfereh ji bo raya giştî bê belavkirin.
