Şehîdgeha Cûma Bilîkî û Binevş Edessa ya li Çiyayê Cûdî ya Şirnexê ye, piştî 11 salan cara yekem hate ziyaretkirin.
Şehîdgeha li gundê Sipîndarokê yê Şirnexê ya ku gorên endamên HPG û YJA Starê lê ne. Şehîdgeh di sala 2015an de ji ber bombebaranê hatibû wêrankirin, 11 salan bi hinceta ku ew “herêma ewlehiya leşkerî” ye, çûna wir hat astengkirin. Malbata Cîhan Uluş (Yilmaz Xorto) yê ku li şehîdgehê hatiye veşartin, piştî ku ji Fransayê hat, serdana gora zarokê xwe kirin. Şehîdgeh ji hêla dayika wî Fatime Uluş, xwişk û birayên wî Elîf, Sultan, Hasan û Mehmet Uluş ve hate ziyaretkirin. Rêveberên MEBYA-DERê yên Şirnexê jî bi malbata rê bûn.
Piştî rêwîtiyek dijwar xwişk û birayên Uluş gihîştin şehîdgeha wêranbûyî, lê dayika wan Fatime Uluş ji ber pirsgirêkên tenduristiyê 500 metre dûrî şehîdgehê ma. Dema ku xwişk û birayên Uluş gihîştin şehîdgehê, piştî lêgerînek dirêj kevirê gora birayê xwe di nav gorên wêranbûyî de dîtin. Xwişk û birayên Uluş diyar kirin ku hemû gor ên birayê wan in, Piştî ku demek dirêj di nav goran de geriyan û hêstir rijandin. Endamên malbatê berî ku biçin ji her gorekê destek ax ji bo dayika xwe hilgirtin.
MEBYA-DERê derbarê serdanê de li nêzîkî şehîdgehê daxuyaniyek çapemeniyê da. Hevserokê MEBYA-DERê yê Şirnexê Ramazan Togrul ji ber serdanê spasiya malbatê kir û got, “Malbat îro tevî gelek zehmetiyan hat vir. Dayik ji ber nexweşiyê nekarî biçe cihê ku gor lê ne. Bi hezaran kîlometre rêwîtî kirin û gihîştin Cûdiyê. Em dayikê ji bo biryardariya wê pîroz dikin. Pêvajoya Aştî û Civaka Demokratîk berdewam dike. Li Şirnexê 5 şehîdgeh hene û hatine wêrankirin. Divê ev goristan werin çêkirin. Divê her dayik bikaribe serdana gora zarokê xwe bike.”
