TUHAY-DERa Rihayê li dijî binpêkirinên mafan û rewşa girtiyên nexweş daxuyanî da. Di daxuyaniyê de hate destnîşankir ku divê girtiyên nexweş tavilê bên berdan û wiha hate got: “Neberdana girtiyên nexweş ku li ber mirinê ne bixwe jî êrişeke li dijî pêvajoyê ye.”
Nûneratiya Komeleya Piştgirî û Alîkariyê ya bi Malbatên Girtî û Hikûmxwaran re (TUHAY-DER) a Rihayê li dijî binpêkirinên mafan ên li girtîgehan daxuyanî da. Daxuyanî li pêşiya Edliyeya Rihayê hate lidarxistin û gelek kes tev li bûn.
Beriya daxuyaniyê, ji aliyê Ciwanên Welatparêzên Kurdistanê (YCK) ve pankarta bi nivîsa “Bi hêviya berxwedana ku di zindanan de deng veda, em ê jiyana azad ava bikin” hate vekirin. Di çalakiyê de dirûşmên “Bijî berxwedana zindana” û “Şehîd namirin” hatin berzkirin.
Hevberdevka Nûneratiya TUHAY-DERê Ayla Ozdemir Barlin di daxuyaniyê de axivî û wiha got: “Divê girtîgeh nebin cihê bêtedawîbûnê û mirinê. Vê windahiya bi êş careke din nîşanî me da ku divê girtiyên nexweş tavilê bên berdan û mafê wan ê jiyanê bê misogerkirin. Divê dawî li van sèwazên derqanûnî yên li dijî girtiyên nexweş bê anîn; astengên qanûnî û îdarî yên li pêşiya berdanê bên rakirin. Armanca Pêvajoya Aşitiyê û Civaka Demokratîk ew e ku înkara sed salî bi dawî bibe û biratiya dîrokî xurt bibe. Neberdana girtiyên nexweş ku li ber mirinê ne êrişa li dijî pêvajoyê ye û hem jî êrişa li ser hiqûqa xwişk û biratiyê ye.”
