Li navçeya Licê ya Amedê di navbera du malbatan de şer derket. Jina bi navê Figen Baran a 18 salî ku dema şer qewimî di wir re derbas dibû bû hedefa guleyan û hate kuştin.
Li navçeya Licê ya Amedê di navbera malbatên Yilmaz û Mizrakli de ji ber lihevnekirina erd şer derket û jina bi navê Figen Baran a 18 salî ku dema şer qewimî di wir re derbas dibû bû hedefa guleyan û hate kuştin.
Li gorî agahiyan; li mezraya Xelbeqnê ya bi ser gundê Cofitnê ya navçeya Liceyê ve ji ber lihevnekirina erd di navbera malbatên Yılmaz û Mizrakli de nîqaş derket. Malbatan piştre bi çekan şer kir. Fîgen Baran a ku haya wê ji şer nebû, dema bi hevjînê xwe re bi wesayîtê di nava gund re derbas dibû, gule lê ket. Fîgen Baran a ku bû hedefa guleyan, li cihê bûyerê jiyana xwe ji dest da.
Lêpirsîn hate destpêkirin
Piştî bûyerê tîmên cendirmeyan sewqî herêmê hatin kirin. Hate ragihandin ku derbarê bûyerê de 7 kes hatine binçavkirin. Cenazeyê Fîgen Baranê ji bo otopsiyê rakirin morga Saziya Tiba Edlî ya Amedê. Serdozgeriya Komarê ya Licê derbarê bûyerê de lêpirsîn da destpêkirin.
