Hemserekê MED TUHAD-FED’î Kerem Canpolat derheqê qanûnê TMK’yî de dîyar kerd ke no qanûn vera demokrasî yo û yan wa bi lezûbez bêro bedilnayîş yan zî bêro hewanayîş.
Serekwekîlanê Grûba Meclîsî ya DEM Partî Gulistan Kiliç Koçyîgît û Sezaî Temellî û Hetkara Hemserekîya Pêroyî û Hemverfekê Komîsyonê Heqanê Merdiman Ozturk Turkdogan 23ê nîsane Wezîrê Edaletî Yilmaz Tunç reyde pêvînayîş kerd û xeylê babetan ser o nîqaş kerd. Nê babetan ra yew zî bedilnayîşê yan zî hewanayîşê Qanûnê Mucadeleyî yê Vera Terorî (TMK) bî. Xeylê kesî semede TMK’yî “hetkarî” yan zî “endamtîya rêxistine” yenî hepskerdiş û muhakemekerdene. Bi seyan sîyasetmedar û welatijanê kurdan bi baxaneyê TMK’yî hepisxaneyan de yê.
Hemserekê Federasyonê Komelanê Huqûq û Paştîdayîşî yê Keyeyanê Hepsîyan û Hukumwerdan ê MED’î (MED TUHAD-FED) Kerem Canpolat derheqê TMK’yî de ajansê ma rê qise kerd.
Kerem Canpolat dîyar kerd ke TMK seba pêroyîya hepsîyan telûke yo û wina va: “TMK astengî yo, qanûnê bingeyî yê pêroyîya dinya de çiyêko winasîn çin o. TMK tena Tirkîya de est o. TMK hukmatê verên yê faşist ê Îtalya ra ameyo girewtene. No qanûn seba aştîwaşt, demokrasîwaşt û azadîwaştanê Kurdîstan û Tirkîya de asteng o. Qanûnê bingeyî de TMK vera adaletî yo. TMK nika vernîya prosesî de zî astengîyêko gird o. Huqûqnas xo ra vanî; yan wa no qanûn bêro bedilnayîş yan zî bêro hewanayîş.”
‘Heqê merdiman rîyê TMK’yî ra yenî binpaykerdiş’
Kerem Canpolat da zanayîş ke seba hepsîyanê nêweş û pêroyî hepsîyan wa TMK bêro bedilnayîş û nê çîyî vatî: “Raya pêroyî heme zanê ke ganî Tirkîya de qanûnê bingeyî yê newe bêro amadekerdiş la sey vatişanê dewlete nê. Tirkîya ewro bi qanûnanê darbeyî yena rayberdiş. No çî xora nakokî ya û vera demokrasî ya. No qanûn tesîr dano pêroyîya hepsîyan, sere de hepsîyanê nêweşan. Hepsiyanê Tirkîya de ewro xeylê hepsîyê nêweşî est ê. Ma zî sey federasyon û komela heqanê merdiman wazenî ke hepsiyê nêweşî bêrê veradayîş. Hepsî hepisxaneyan de nêeşkenî tedawî bibî û nêyenî tedawîkerdiş. Demo ke hepsîyan benî nêweşxaneyan destê înan kelemçekerde yê. Xeylê reyan heyetê hepisxaneyan bi çimêko dişmenkî hepsiyan ra ewnîyenî. Birêz Abdullah Ocalan û kurdan gamî eştê, wa nika zî dewlete game bierza.”
‘No qanûn vera demokrasî yo’
Kerem Canpolat ard vîr ke pêroyîya beşanê komelî wazenî qanûnêko newe bêro amadekerdiş û va: “Komel hetê xo ra eşkera kerd ke no qanûn vera demokrasî yo. Tirkîya de çiray qanûnî seba cuya merdiman asan û rehet bikerî nêameyê amadekerdiş. Dewlete tena seba xo bipawa qanûnan bikar ana. Waştişê ma amadekerdişê qanûnê bingeyî yê neweyî yo. Wa mîyanê nê qanûnanê bingeyî de pêroyê beş û komelê Tirkîya bibê. Seba prosesî zî na game hewce ya.”
