Birîndaranê Awbendê Tişrînî dîyar kerd ke xoverdayîşê şarî do heta serkewtişî dewam bikero û vat ke tewrê birîndarbîyayîşê xo zî, eke bêro waştene ê do reyna verê xo bidê Awbendê Tişrînî.
Şarê Vakûr û Rojhelatê Sûrîye 8ê çele ra nat xoverdayîşê xo yê vera hêrîşanê dewleta tirke û komanê paramîlîteran bi îradeyêko bihêz Awbendê Tişrînî de dewam keno.
6ê sibate de karwanê çarin yê ke Kobanî ra ver bi Awbendê Tişrînî rayîr kewt, hetê dewleta tirk ra rastê hêrişî ame û netîceyê hêrişî de 24 welatî birîndar bîyê.
Birîndaran ra yew zî Hecî Şahîn Qulawazî (44) derheqê birîndarbîyayîşê xo de wina vat: “Ma hema ke resayê awbend, dewleta tirke bi hovîtîya xo bi teyareyanê şerî hêrişê ma kerd. Ez madê xo ra bi giranî birîndar bîya.”
Şahîn Qulawazî dîyar kerd ke senî ê 2014î de çeteyê DAÎŞ’î Kobanî de binvistê ê do reyna dewleta tirk zî binfînê û wina dewam kerd: “Dewleta tirke qet nêşena bi nê hêrîşan îradeyê ma qels bikera. Senî ke ma 2014î de estbîyayîşê xo vera çeteyan îsbat kerd, ma do reyna estbîyayîşê xo vera dewleta tirke îsbat bikê. Yan ma do bi rûmet biciwîyê yan zî bimirê. Ma soz dayo şehîdanê xo, ma do heta peynî xoverdayîşê xo bidomnê.”
Hecî Şahîn Qulawazî ard ziwan ke ê amade yê têkoşînê xo bidomnê. Tewrê birîndarbîyayîşê xo zî eke bêro waştene, o do agêro Awbendê Tişrînî û awbend vera bipawo.
‘Awbendê Tişrînî rûmetê ma yo’
Kelîme Şewket (42) ard ziwan ke înan seba pawitişê awe û cereyanê xo verê xo dayo Awbendê Tişrînî û va: “Ma sey şarê herême, seba pawitişê awe û erdê xo vera hêrîşanê dewleta tirke ma verê xo da awbendî. Awbendê Tişrînî rûmetê ma yo, ma do hertim rûmetê xo bipawê.”
Kelîme va: “Wexto ke karwanê Kobanî yê 4. verê xo da awbendî, ez zî şîya. Wexto ke karwan resa uca, ma hetê teyareyanê dewleta tirke ra ameyê hedefgirewtene. Dewleta tirk wazena tersî dekera zerrîya ma, la zerrîya ma bihêz a, ma hêrîşanê înan ra qet nêtersenê.”
Kelîme Şewket dîyar kerd ke wexto ke a birîndar bîya, qet moralê aye qels nêbi û va: “Wexto ke ez birîndar bîya mi bi dejê birînanê xo hîs nêkerd, seba ke ez wayîrê hêz û moralî bîya. Qet moralê mi nêşikîya. Tewrê birîndarbîyayîşê mi zî eke bêro waştene ez do reyna şêra awbend.”
