Wezîrê Karanê Teberî yê Fransayî Jean-Noel Barrot dîyar kerd ke înan mabênê Hêzanê Sûrîya Demokratîk (HSD) û Tirkîya de mabênkarî kenê û piştgirîya Fransayî ya seba kurdan tekrar kerde.
Wezîrê Karanê Teberî yê Fransayî Jean-Noel Barrot cewab da mektubê Senator Pascal Savodellî ke mektubî de ameyêne vatene, ganî Fransa Rayberîya Xosere ya Vakur û Rojhelatê Sûrîye tena nêverda. Barrot îfade kerd ke Fransa Kurdanê Sûrîye pawena û hewldayîşanê xo yê dîplomatîk ê seba aramîya herême dewam kenê.
Mektubê Wezîr Barrot ê seba Senator Savodellî wina yo:
‘Ganî heme heqê kurdan bêrê naskerdene’
“Fransa rewşa Kurdanê Sûrîye -hevalbendê ma yo tarîxî yê têkoşînê vera terorîzmî- bi baldarîyêka taybete taqîb kenê. Zilmo giran û bi gonî ya Beşar Esad a şarê xo ser o ke serra 2011 û aye ra pey dewam kerd, bi sebeb ke tehdîdê terorê DAÎŞ’î vêşî bibo. Hemverê nê tehdîdî sey Fransa ma çarçewaya koalîsyonê mîyanneteweyî yê vera DAÎŞ’î Hêzanê Sûrîyeya Demokratîke reyde bêmabên têkoşîn da. 8ê kanûna 2024î de bi rijîyayîşê rejîmê Esadî Sûrîye de hêvîyêka pîle vejîyaye orte. Sûrîyeya newa de ganî kurdî bi rengêko tam û sey welatijanê seypê beşdarê newe ra awankerdişê Sûrîye de ca bigîrê, wayîrê nasnameyê xo bibê û bi taybetî zî heqê înan ê kulturî bêrê şinasnayene.
Prosesê vîyartişî yê Sûrîye de ganî her kes ca bigîro
Fransa prosesê vîyartişî yê sîyasî yê aştîyane û proseso ke her kesî hewîneno, prosesêko winasîn de bi qerar a. No nêzdîbîyayîş hetê Serekkomarê ma ra 7ê gulane de Parîs de pêvînayîşê bi serekê demkî yê Sûrîye Ahmed el Şaraa de reyna ame teqezkerdene. No prosesê vîyartişî yo sîyasî ganî heme temsîlkaranê komelanê Sûrîye bîyaro têhet.
Ez biserûber Mazlûm Ebdî reyde pêvînayîşan kena
Peymana pîvanî ya ke 10ê adare de mabênê Otorîteya Sûrîye û Hêzanê Sûrîyeya Demokratîke de ameye îmzakerdene, hetêk ra gama destpêkî ya pozîtîf a û wext reyde ganî newe ra yewbîyayîşê Sûrîye û entegrasyonê kurdan bêro caardene. Sey Fransa seba mabênkarî û piştgirîya bi dîyalogî ma hetkarîya prosesî kerd û seba ke na peymane bi temamî bêra caardene, ma piştgirîya xo ya seba dayîşûgirewtişî domnenê. Na çarçewa de 24ê nîsane de Hewlêr de mi Fermandarê Pêroyî yê Hêzanê Sûrîyeya Demokratîke Mazlum Ebdî reyde pêvînayîş kerd û ey reyde tim pêvînayîşan kena. Pêvînayîşî de ma rayîrê teqezkerdişê ewlekarîya nufusê kurd ê Vakur û Rojhelatê Sûrîyeyî erjna.
Ma mabênê tirk û kurdan de mabênkarî kerde
Reyna ma hewl danê ke entegrasyonê kurdanê Sûrîye derûdoranê herême reyde teqez bikerê. Mabênê kurdanê Vakur û Rojhelatê Sûrîye û rayedaranê tirk de ma karê mabênkarî kerd. Pêvînayîşanê xo yê biserûber de ma vengdanê rayedaranê tirk ke kêmkerdişê kaosî rê teşwîq bikerê û şer biqedênê. Ma vendanê heme hetan ke goreyê modûsêko musaît a vîvendî (rayîrêkê pêameyîşî) peyda bikerê. Reyna seba pêvînayîşanê mabênê kurdanê Sûrîye û kurdanê Îraqî asan bikerê, ma xebitîyenê.”
