Girewteya sîyasî ya kurd Werîşe Muradî ke Hepisxaneyê Qerçaxî de ya û cezaya dardekerdişî aye rê ameya dayene, serrgêra serewedaritişê “Jin Jîyan Azadî” yê 3. de vengda heme cinîyan ke “Jin Jîyan Azadî” ravurnê manîfestoyê azadîye.”
Girewteya sîyasî Werîşe Muradî ke cezaya dardekerdişî aye rê ameya dayene, bi munasebetê serrgêra serewedaritişê “Jin Jîyan Azadî” yê 3. mesajêk erşawit.
Werîşe Muradî mesajê xo de wina vat: “No şoriş bi estbîyayîşê xo yê zaf hetî, ne tena teqîyayîşê hêrsê kuçeyan o û ne zî waştişê qismî yê beşêko yekane yo. Serewedaritişê waştişan azadîyanê takekesî û kolektîfî ra bigîre heta heqê xorayberdişo kolektîf, waştişanê bingeyîn ê aborî ra bigîre heta edaletê kulturî, heqê etnîkî û ziwanî, têkoşînê vera zordarîya zayendî ra bigîre heta waştişanê komelêkê demokratîkî şono. Ma nêeşkenê na roje tena sey rojêka vîrardişî bigîrê dest, no serewedaritiş ganî bibo manîfestoyê cuyêka azade.”
‘Qerarê dardekerdişî vera cinî, cuye û girewtişê qesasî yê’
Werîşe Muradî bale ant tesîrê nê qeraran, bi taybetî cinîyanê girewteyan ser o û vat: “Çîyo ke cinîyanê girewteyan rê yeno kerdene, beşêk projeyê qesasî yo. No qesasêko vera cinî, cuye û azadîye yo û delîlê tesîro xorîn ê têgêrayîşî yo. Ê wazenê bi cumleyan têgêrayîşê laşê komelkî vindarnê; la ê qet nêeşkenê zîhnîyeto pêşeng o ke îlhamê nê têgêrayîşî dayo, orte ra wedarnê. Heta ke girêdayîya bi raman û çalakî dewam bikero û pênaseyêko newe yê azadîye û demokrasî bêro taqîbkerdene, her cumle do giranîya ci vêş bikero.”
‘Jin, Jiyan, Azadî ravurnê manîfestoyê azadîye’
Werîşe Muradî dîyar kerd ke lazimtîya pawitişê bîrdozîya “Cinî, Cuye, Azadîye / Jin, Jiyan, Azadî” est o û do sey “lazimtîyêka tarîxî” pênase kerd. Werîşe nuşteyê xo bi nê vatişan qedîna: “Na bîrdozî girêdayîyêka mabênê teorî û pratîlê rojane de yo; no seba rêxistinkerdiş, perwerdeyîya sîyasî, awankerdişê sazgehanê demokratîk ê paralel, naskerdişê rolê cinîyan ê serekîya kolektîf de û newe ra awankerdişê aborî, kultur û edaletî bingeyê rûmetê merdiman rayîrêk o. Ez şima ra wazena ke şima na serrgêre nêkerê serdemêkê tazîyeyî; aye ravurnê manîfestoyê cuyêka azade. Mektub, not, kombîyayîşê şenik û girdî, cigêrayîşê teorîkî û perwerdeyîya azanê neweyan, pêro amûrê ke ganî pîya bêrê şuxulnayene, nê yê. Ganî ma nîşan bidê ke kifşkerdişê cinîyan waştişêk nîyo, programê çalakî yo; programêk o ke qada pêroyî bedilneno û cuya têduşt teqez keno.”
