Wendekarê Unîversîteya Munzurî, seba Rojîn Kabaîş û Gulîstan Doku rayîrşîyayîşêk organîze kerd.
Wendekarê Unîversîteya Munzurî, seba Gulîstan Doku ke 5ê Çeleyê 2020î de Dêrsim de vîndî bîya û aye ra xebere nêameya girewtene û Rojîn Kabaîş ke 27ê Êlula 2024î de Wan de vîndî bîya û 18 rojî ra dima cenazeyê aye ame vînayene, rayîrşîyayîş organîze kerd. Rayîrşîyayîşo de ke kampusê unîversîte de virazîya, fotografê Rojîn Kabaîş û Gulîstan Doku ameyî tepiştiş. Reyna pankartê “Jin, Jîyan, Azadî” û “Qetilkerdişê cinîyan polîtîk o” ameyî tepiştiş.Rayîrşîyayîşî de rey-rey sloganê “Gulîstan kotî ya?” “ Bibe vengê Rojîn” û “Qetilkerdişê cinîyan polîtîk o” ameyî dayene.
Wendekare Ruken Ecere ke rayîrşîyayîşî ra pey qisey kerd û va: “Gulîstan Doku 5 serrî verê cû bi polîtîkayanê zanayeyan û sîstematîkanê rejîmê şerê taybet ra ameye vîndîkerdene. Rejîmê şerê taybet bi heme dezgeh û polîtîkayanê xo yê lêminan roşn nêkeno ke se bîyo Gulîstan. Şubhelîyo tewr verên Zaynal Abakarov nêyeno mehkemekerdiş, yeno pawitene. Ma zanê ke Dêrsim de ke her ca bi kameran yeno temaşekerdene û her game de GBT yena kerdene û bi quwetanê polîsan pirr o, derheqê embaza ma de agahdarî nêdayîş netîceya polîtîkayanê şerê taybet o.”
‘Netîceya polîtîkayanê şerê taybet o’
Ruken Ecere bale ant merdişê Rojîn Kabaîşe ser ke Wan de bi hawayêko şubhelî vîndî bîye û 18 rojan ra pey cenazeyê aye ame vînayene û wina dewam kerd: “Qetilkerdişê Rojîn zî sey vîndîkerdişê Gulîstanî, polîtîkayanê zanayeyan û sîstematîkan ê rejîmê şerê taybet ra cîya nîyo û îdeolojîk o. Kampusê Unîversîteya Wanî de ke her cayê aye pirê kamerayan o tena yew dîmenê Rojîn Kabaîş est o. Seba ke raştîye binimnê sewbîna dîmenanê kamerayî nêdanê. Rejîmê şerê taybet o ke bi vatişê tedbîranê emnîyetî kampusan keno rewşêka ke nêeşkîyeno tede biciwîyo, çi tesaduf o ke şopêk zî derheqê qetilbîyayîşê Rojîn de nêvîneno. Ma zanê ke nînan ra çîyêk tesadufî nîyo, netîceya polîtîkayanê qirkerdişê cinîyan ê rejîmê şerê taybet o.”
Ruken Ecere qeyd kerd ke ê do kampusan ra heta kuçeyan têkoşînê xo gird bikerê û wina qedêna: “Ma do hesabê heme embazanê xo yê ke ameyî qetilkerdene û vîndîkerdene bipersê. Sere de cinîyê ciwanî û heme cinîyan ra ma vanê ke, vera qirkerdişê cinîyan bi zanayîşê pawîtişê xo rêxistin bikerê û têkoşînî gird bikerê.”
