Sazgehê huqûqî yê Anqara derheqê hêrişê nîjadperestî yê ke vera wendekaranê kurd ame kerdene de dîyar kerd ke dekan hêrişkaran paweno û da zanayene ke ê do na rewşe taqîb bikerê.
Aşma hezîrane de, roja 8ê aşme de 4 wendekarê kurdî yê ke Unîversîteya Anqara de Beşê Huqûqî de wanenî, hetê tayê kesanê ke xo sey “Têgêrayîşê Ulkucu” bi name kenî, rastê hêrişê nîjadperestî ameyî. Şubeyê Komela Huqûqnasanê seba Azadîye (OHD) ya Anqara, Komela Huqûqnasanê Hemdemî (ÇHD), Piştgirîya Huqûqnasan û Huqûqnasê Komelkî, derheqê nê hêrişê nîjadperestî de awanîya Şubeyê OHD’yî yê Anqara de eşkerayîya çapemenî daye. Endama Şubeyê OHD’yî yê Anqara Doru Nînsu Arslan metnê eşkerayî wend.
Doru Nînsu Arslan îfade kerd ke unîversîteyan de kerdiş û hereketê vera demokrasî zêde benî û wina vat: “Unîversîteyî rewşêka zaf xirab de yê. Unîversîteyî ganî seba azadîya fikran bibê sey cenetî, labelê îqtîdar û çeteyanê paramîlîteran rê bîyê sey cenetî. Dimayê xirabîyayîşê proses û dewrê çareserî yê serranê 2013-2015î de destbendkerdiş, girewtiş û îxracî ke bi KHKyan ameyî kerdene, unîversîteyan ser o zî tesîr kerd û unîversîteyî bîyê sey çolîstanî.”
‘Dekan grûbanê hêrişkaran paweno’
Doru Nînsu Arslan îfade kerd ke wendekarê kurdî Unîversîteya Anqara de hetê grûbanê ke xo sey ‘Têgêrayîşê Ulkucu’ pênase kenî, rastê hêrişan ameyî û wina dewam kerd: “Wendekarê kurdî rastê hêriş û heqaretan ameyî. Hêrişê nîjadperestî yê vera wendekaran, nê dewrê îmtîhanan de heqê perwerdeyî yê wendekaran asteng kenî. No hêriş netîceyê dişmenîya vera kurdan de ameyo kerdene. Dekanê unîversîteyî piştgîrîye dano nê grûbanê hêrişkaran. Ma do prosesê gerreyî yê wendekaran taqîb bikerê. Ganî heqê perwerdeyî yê wendekaran bi şeklêko biserûber bêro caardene. Ganî kesê ke nê hêrişî kerdo bêrê muhakemekerdiş.”
