Wendekaranê bajarê Girkê Legê biryarê sînordarkerdişê perwerdeyê bi kurdkî red kerd û waşt ke perwerdeya înan pêro bi kurdkî bibo.
Wendekaranê bajarê Girkê Legê yê herêmê Cizîrî, derheqê biryaranê sînordarkerdişê kurdkî yê qada perwerdeyî de, ANHA rê qisey kerd.
Wendekara Selma Umere vat: “Ma na biryare qebûl nêkenê, ma perwerdeyê bi kurdkî ra hîn bîyê, seba ma zehmet o ke ma perwerdeyê bi erebkî bivînê, ma wazenê ke perwerdeya ma pêro bi kurdkî bibo.”
Selma Umere wina dewam kerd: “Heqê ma yo ke ma perwerdeyê xo bi ziwanê xo yê dayîke bivînê, ma wazenê perwerdeyê xo bidomnê û dersanê xo bi ziwanê ke ma tewr verê ra pê dest pê kerdo, dewam bikerê. Ma seba naye pawitişê heqê xo yê perwerdeyê bi kurdkî wazenê.”

Ferhad Cemîlî zî vat: “Ma perwerdeyê bi kurdkî dî, ma wazenê nê perwerdeyî bidomnê. Nêbeno ke hewte de tena 3 ders ma rê bêro dayene, nêbeno ke dersê mayî zî ma bi ziwanêko bîn hîn bibê.”
Ferhad Cemîlî waşt ke kurdkî bibo ziwanêko fermî û destûrê neweyî yê Sûrîye de bêro naskerdene. Ey vat ke ganî perwerdeyê înan yê bi ziwanê dayîke garantî bêro girewtene.

Nisrîn Mihemede zî ard ziwan: “10 serran ra vêşî yo ke ma perwerdeyê bi kurdkî dî, ma dersan û materyalanê bi kurdkî ra hîn bîyê. Vurnayîşê ziwanê perwerdeyî seba ma gameyêka asan nîya.”
Nisrîn Mihemede dîyar kerd ke hewte de dayîşê 3 dersanê bi kurdkî seba înan bes nîyo; kurdkî tena yew ders nîyo ke bi çend seatan bêro dayene.

Egîd Osêyî dîyar kerd ke biryarê ke ame dayene, pêdîyayîşanê înan yê perwerdeyê bi ziwanê dayîke ra nêgoreno û ganî pêro ders bi kurdkî bibê.
Egîd Osêyî eşkera kerd ke heqê her wendekarî yo ke perwerdeyê xo bi ziwanê xo yê dayîke bivîno, no heqê wendekaranê kurdan zî yo û wina vat: “Ma tena heqê xo yê perwerdeyê bi ziwanê dayîke û dewamkerdişê perwerdeyê bi kurdkî wazenê.”












