Cinîyê ke Pêvînayîşê Cinîyan a Ked, Kultur û Hunerî ya Amedî de standî akerdî, vatî ke cinî bi keda xo serê lînganê xo ser o manenê û waştî ke keda cinîyan bêro dîyayîş.
Pêvînayîşa Cinîyan a Ked, Kultur û Hunerî ya Amedî ke bi serkêşîya Serekîya Daîreya Xizmetanê Keyeyî û Cinîyan a Şaredarîya Şaristanê Girdî yê Amedî, Qada Şêx Seîdî de dest pêkerd, hîrê rojan dewam keno. Zaf kesî tewrê pêvînayîşê benê ke tede kultur, ked û hunerê cinîyan do bêro mojnayîş. Her wina zaf şaredarî, sazî û dezgehan standanê xo nê pêvînayîş de ronayî û çîyê ke bi keda cinîyan ameyî amadekerdiş, serê dezgehan de yê. No mojnayîş yanî pêvînayîş xoser keda cinîyan a. Cinîyê ke tewrê pêvînayîşê bîyî û standanê xo akerdî, ajansê ma rê qisey kerdî.
‘Cinî êdî eşkenê debara xo bikerê’
Cinîya bi nameyê Hatîce Navcî ard ziwan ke Farqîn de nameyê Merkezê Hetkarî û Cuye ya Cinîyan a Nûdemî ser o stand akerdî û wina qisey kerde: “Ez mamostaya dûrayîş û neqşê ya. Ma nê çîyê ke serê standa ma de yê bi wendekaranê xo de kenê. Merkezê ma nê di aşman a ke ameya açarnayîş, merkez de zaf kursê cîya cîyayî est ê. Cinî merkez de banderî karî benê. Cinî bi nê xebatan eşkenê debara keyeyê xo bikerê. Gedeyanê xo rê wayîrî kenê, çimê înan destê camêrdan de nîyo. Xebatê wîna verê cinîyan akenê ra. Nê 9 serran a ke mi her hîrê gedeyanê xo zî bi nê karî pîl kerdî. Qeyûm ameyî, ma kar ra eşteyî la ma hewna zî karê xo keyeyî de dewam kerd û ma domanê xo dayî wendiş. Ez cinîyan pêro rê vanî ke şima zî eşkenê nê karî bikerê û binê destê camêrdan de nemanê. Ma wazenê cinî karê cîya cîyayî bikerê. Cinî zaf karan kenê la keda cinîyan nîna dîyayayîş. Lazim o şaredarî karê wina zêdêr bike ke keda cinîyan bêro dîyayîş.”
‘Ma ewro keda xo danê naskerdiş’
Cinîya bi nameyê Halîme Akkûş da zanayîş ke a penêr, riwenê nivîşkî, salçe, nanê tendûrî û riwenê zeytînî dewe de virazena û a înan na ca de roşena û wina domna: “Şaredarî na xebate de ma zaf kêfweş kerdî. Ma na ca de çîyê ke cinî kenê, yenê roşenê. Cinî keda xo danê naskerdiş. Şaredarîya Rezanî seba cinîyan çîyê zaf avzelî virazena. Ma ewro eşkenê vajê ke şaredarî seba cinîyan xebatan amade kena. Verî ke wextê qeyûman ma çîyê başî seba cinîyan nêvênayî. Wexto ke qeyûm ameyî, kursanê ma girewtî. Waştişê ma no yo ke şaredarîyê ma hewna biakerî. Ma cinî wazenê bêrê têlewe û xebatanê xo virazê. Ma wazenê keda cinîyan her ca de bêro dîyayîş.”
