Çalakîyê “Sporê Serê Sibayî” ke Şaredarîya Amedî ya Şaristanê Girdî bi amancê ke hemwelatî adetê cuya biweşîye bigîrê, organîze kena, merkezê şaristanî de 4 cayanê cîyayan de perwerdekaranê pisporan reyde pêroyê serre de dewam kenê.
Şaredarîya Amedî ya Şaristanê Girdî, bi amancê ke hemwelatî biweşî dest bi roje bikerê û cuyêka hîna biweşîye biramê, çalakîyanê “Sporê Serê Sibayî” organîze kena. Bername ke hetê Serekîya Daîreya Xizmetanê Ciwanî û Sporî ra yeno ramitene, Parka Anitî, Parka Koşuyoluyî, Parka Tema û Parka Kentî de perwerdekaranê pisporan reyde pîya yeno kerdene.
Çalakîyan de ke mîyanê hewteyî de her roje mabênê saetanê 07.00-09.00 de yenê organîzekerdene, hemwelatîyan rê egzersîzê ke rê emr û rewşa înan a fîzîkî munasîb a, yenê kerdene. Bernameyo ke xebatê germbîyayîş, elastîkî, hemsengî, koordînasyon û hêzî tede ca gênê, seba beşdarîya hemwelatîyanê emr û sewîyeyanê fîzîkîyan ê cîyayan akerde yeno domnayene.
‘Amancê ma no yo ke ê biweşî hîna zêde dest bi roje bikerê’
Mîne Avşar ke Parka Anitî de ke qezaya Yenîşehîrî de yo, hemwelatîyan rê perwerdekarîye kena, dîyar kerd ke xebatî bi no hewa yenê kerdene ke hemwelatîyê her emrî bieşkê goreyê sewîyeya xo spor bikerê. Avşar vat: “Mîyanê hewteyî de her roje serê sibayî mabênê saetanê 07.00 û 09.00 de ma spor kenê. Amancê ma no yo ke hemwelatîyê ma yê tîyayî biweşî û enerjîya hîna zêde dest bi roje bikerê. Ma xebatanê germbîyayîş, elastîkî, hemsengî, koordînasyon û hêzî kenê ke emr û rewşa înan a fîzîkî munasîb a. Ma xebatanê xo bi hewayêko ke her kes û sewîye rê munasîb o dewam kenê û bala xo danê ke herkes goreyê sewîyeya xo hereket bikero.”
‘Xebatê ma pêroyê serre de dewam kenê’
Avşar îfade kerd ke beşdarîya biserûbere ya hemwelatîyan a çalakîyan înan zî şa kena û vat: “Çîyanê tewr muhîman ra yew zî seba ma zî no yo ke hemwelatî xebatanê ma ra zaf memnûn ê. Ê her serê sibayî bi waştişêko gird yenê tîya û sporê serê sibayî sey parçeyêkê rutînê xo yê rojaneyî vînenê, ma zî şa û motîve keno. Xebatê ma pêroyê serre de dewam kenê. Hûmara beşdaranê ma zî zaf berz a.”
‘Wexto ke ma yenê tîya moral gênê’
Selma Reşîtoglu ke beşdarê sporê serê sibayî bena, va ke çalakîyî hem hetê fîzîkî hem zî hetê komelkî ra piştî danê înan. Reşîtoglu vat: “Ma zaf şa benê ke ma yenê tîya û spor kenê. Ma zaf memnûn ê ke ma embazanê xo reyde mîyanê şayî, hurmet û herkerdişî de, keskîye mîyan de spor kenê. Ma tîya hetê têkilîyanê keye û embazîye ra her çîyî ra nimûne gênê. Wexto ke ma nêyenê tîya, ma zaf teng benê. Wexto ke ma yenê tîya, moral gênê, ma hîna enerjîk benê.”
Reşîtoglu dîyar kerd ke ê badê çalakîyanê sporî rayîr şinê û vat: “Ma serê sibayî saete 07.00 de yenê, 07.30 de dest bi sporî kenê. Naye ra teber ma 2-3 saetî rayîr şinê. Coka ma zaf şa yê. Ma wazenê ke hertim wina bo.”
‘Hem ruhê ma rê hem zî bedenê ma rê rind yeno’
Roza Bagca zî ke bi hewayo biserûber beşdarê sporê serê sibayî bena, îfade kerd ke çalakîyî hem bedenê aye rê hem zî ruhê aye rê rind yenê. Bagca vat: “Ez bi hewayo biserûber yena tîya. Embazê tîyayî zaf rind ê, mamostaya ma rind a. Ma bi hewayo biserûber egzersîz kenê. No hem ruhê ma rê hem zî bedenê ma rê rind yeno; ma şîfa vînenê. Ma naye ra memnûn ê, ma herkesî rê sipas kenê.”
