Wan de bi sloganê ‘Bi Rayberîya Azade Ver bi Komelê Demokratîkî’ amadekarîyê ‘Mîtîngê Azadîye’ yenî vîraştene. DBP û DEM Partî veng da şarê Wanî ke tewrê mîtîngî bîbê û dîyar kerd ke azadîya fîzîkî ya Rayberê Şarê Kurdî Abdullah Ocalanî kilîdê aştîya komelkî ya.
Partîya Herêman a Demokratîkan (DBP) û DEM Partî Salona Tahîr Elçî ya Baroyê Wanî de seba ‘Mîtîngê Azadîye’ eşkerayîyêk pare kerd. Eşkerayî de pankartê ‘Bi Rayberîya Azade ver bi KomelêDemokratîk’ ame akerdene û sloganê ‘Bijî Serok Apo’ ame vatene. Parlamenterê DEM Partî, temsîlkarê sazgehanê sivîlan û zaf welatîyî tewrê na eşkerayî bîyî.
Kurmancîya eşkerayî hetê endama komîteya amadekar a mîtîngî Elîfe Şeker ra ameye wendiş.
Elîf Şeker da zanayene ke vengdayîşê Rayberê Şarê Kurdî Abdullah Ocalanî yê 27ê sibate qonaxêka tarîxî ya û wina vat: “Na vengdayîş perspektîfê komelê demokratîk o ke şar eşkeno tede pê ziwan, nasname û statûyê xo bi azad bîciwîyo, veto meydan. Prosesê vyîarte de, pê vindartişê şer û pirodayîşan komelî nefesêk gîrewt, hesirê çimanê dayîkan vindertî û şarî reyna dî ke aştî çend bierj a. Serdemêko winasînî de ke Rojhelatê Mîyanênî pê şer û krîzan ameyo dorpêçkerdene, aştî ewro bîya waştişêko winasîne ke nêyena taloqkerdene.”
Waştişê tewr esasî ameyî rêzkerdene
Elîf Şeker qiseykerdişê xo de îfade kerd ke waştişê şaran o yo ke seba aştîyêka bîrûmet û domdare, gamê demokratîkî bilez bêrê eştiş û nê çîyî vatî: “Verê her çî gerek qanûnê ‘Têkoşînê vera Terorî’ bêra hewaneyene, qanûnê antîdemokratîkî bilez bêrê vûrîyayene. Gerek nê kerdişê qeyûman biqedîyê, girewtwyê sîyasî bêrê veradayene, qedexeyê serê ziwan û kulturê şarê kurdî bi temamî bêrê wedaritene. Seba ke aştî xurt biba û çareserîya demokratîke aver şêra, gerek şert û mercê gureyî û xoresnayîşî yê birêz Abdullah Ocalanî bêrê serastkerdene û bi qanûna bîgîrî bînê garantî, şertê azadîya ey ê fîzîkî bêrê akerdene. Rojhelatê Mîyanênî mîyanê şer û krîzan de mendo; aştî êdî lazimtîyêka winasîn a ke nêna ereykewtiş. Çareserîya demokratîke, tena ameyoxê şarê kurdî nê, ameyoxê hempare yê heme şaran o ke Tirkîya de ciwîyenê.”
Bi sloganê ‘Bi Rayberîya Azade ver bi Komelê Demokratkî’
Elîf Şeker peynîya qiseykerdişê xo de derheqê mitîngê “Hêvî û Azadîye” de agahî dayî û wina qiseykerdişê xo qedêna: “Nê semedî ra, ma sey şarê Amedî; 28ê hezîrana 2026î de, saete 17:00î de Qadê Îstasyonî de, bi sloganê ‘Bi Rayberîya Azad Ver Bi Komelê Demokratîkî’ do qadan de bibê. Bi nê nêzdibîyayîşî ma veng danê şarê xo, ciwanan, cinîyan û kedkaran, yanî pêro hêzanê demokratîkan kenî ke ma bêrê têhet. Nika wext wextê berzkerdişê vengê xo yo! Nika wext wextê berzkerdişê waştişê demokrasî yo. Nika wextê rayraşîyayîşê ver bi azadîye yo.”
Eşkerayî pê sloganan qedîyaye.
