Endamê ÎHD’yî Huseyîn Yaşar Sezgînî bal ant ant ke Dêrsim de 10 hezarî zafêr mayînî est ê û vat ke wa mayînê ke cuya ganîyan tehdît kenê, bêrê pakkerdiş
Mayînê ke her tim çalak ê û cuya ganîyan tehdît kenê, her serre Dinya de benê semedê mergê bi hezaran merdiman. Mayînê bejayî yê ke sey “Telukeyê qetilî yê nêaseyeyî” zî yenê bi namekerdiş û her yew tena 1-2 Dolar ê, yew zî tewirê çekan ê ke heqê cuye, ekonomî û komelkî, roniştiş û aştîye orte ra hewaneno.
Tirkîya û Kurdîstan de çend mayinî est ê, malûmatêko zelal bi dest nêkewto. Tirkîya raporê xo yê 29ê Adara 2013î de ke resnabî Neteweya Yewbînane, dîyar kerdbî ke bi pêroyî 1 mîlyon û 3 hezar mayînî binê herre de mendê. Sey Agirî, Erdexan, Êlih, Çewlîg, Bedlîs, Amed, Dîlok, Colemêrg, Îdir, Qers, Mêrdîn, Sêrt, Riha, Şirnex, Dêrsim û Wan de nê çend şaristan de bi hezaran mayinî est ê.
Bi des hezaran mayinî Dêrsim de est ê
Endamê ÎHD’yî Huseyîn Yaşar Sezgînî na babete ser o vat ke Kurdîstan de destûr nêdanê ke zafêr keye agêrê dewanê xo, nê şaristanan ra yew zî Dêrsim o û wina vat: “Mabênê serranê 1993/94 û 2019î de tewr kêmî 6 doman û bi temamî 12 kesan cuya xo daya û bi teqyayîşê mayinan bi desan kesî zî birîndar bîyê.”
Yaşar Sezgînî eşkera kerd ke herêma Dêrsimî de erdo mayinkerdî est o, naye ser ganî seba aramî û ewleyî wa nê mayinî bêrê pakkerdiş.
