Dayîkanê Şemeyî, hewteyo 1116. de aqûbetê Nadîr Nayci o ke 33 serrî verê cû, serra 1993 de amebi destbendkerdene, persayê. Lajê Nadîr Nayci, mektuba ke çalakîye rê erşawitbi de wina vat: “Wa esteyan bidê, ma do bi destê xo pîyê xo bitemernê. Heqîqat û heqê gorî 33 serrî yo ke yeno taloqkerdene. Ma gorê pîyê xo wazenê.”
Dayîkê/Merdimê Şemeyî bi waştişê “Wa vîndîkerdeyî bêrê vînayene, faîlî bêrê muhakemekerdene” hewteyo 1116. de Meydanê Galatasarayî yê Stenbolî de çalakîya xo ya hewtane viraşte. Dayikê Şemeyî, endam û rayberê ÎHD’yî yê Stenbolî, Dayikê Aştî û xeylî pawitoxê heqanê merdiman tewrê çalakîye bîyî. Çalakîye de fotografê vîndîbîyayan ameyê girewtene. No hewte aqûbetê Nadîr Nayci o ke 33 serrî verê cû, serra 1993 de, Cizîre de amebi vîndîkerdene, ame persayene.
Metnê eşkerayîye hetê Dayika Şemeyî Îkbal Erene ra ame wendene.
‘Çend serrî zî derbaz bibo ma do aqûbetê Nadîr Nayci bipersê’
Îkbal Eren dîyar kerd ke 33 serrî yo ma seba Nadîr Nayci edalet wazenê û vat: “Hîkayeya Nadîr Nayci dîyar keno ke bêedaletî senîn nê welatî de vila bîya. 33 serrî yo keyeyê ey perseno ke Nadîr Nayci senîn ameyo destbendkerdene, ça yo û berpirsîyar kam o; la hema zî tu cewabêk nêameyo dayîş. Cayêko ke aqûbetê welatijan nêno zanayene, ma nêeşkenê qala aştîye bikerê. Nadîr Nayci, 65 serre bi û pîyê 7 gedeyan bi. Cizîre de ciwîyayene û karê erebeyanê astoran kerdêne. Serra 1993 de seba astorêk bido merdimê xo, şi dewa Biyaqûbkî. Badê rojêke astor ame keye la Nadîr nêame keye. Lajê Nadîrî dima ra aqûbetê pîyê xo perseno, pê hesêno ke pîyê ey qet nêşîyo dewe. Nadîr Nayci seba şêro dewa xo ganî dewa Kuştepeyî ra derbaz bibayene. Kuştepe zî ê wextan merkezê Hîzbûllahî bî. Lajê Nadîrî, Ramazan Nayci şino fermadarê cendermeyan ê qezaye, Cemal Temîzozî ver û qalê aqûbetê pîyê xo keno û wazeno dewa Kuştepeyî de tehqîqatêk bêro viraştene. La Cemal Temîzoz, Ramazan Nayci ra vano; ‘Ti bi xo şore pîyê xo bigêre.’ Serra 2009 de keyeyê dewa Basîsikî de tehqîqat ame viraştene û esteyê merdiman ameyê vînayene. Keyeyî seba testê DNA’yî muracat kerd la waştişê înan hetê Serdozgerîyê Komara ya Cizîre ra ame redkerdene. Îtîrafkar Mehmet Nurî Bînzetî dewaya JÎTEM’î ya Cizîre de îfade da û dîyar kerd ke Nadîr Nayci hetê Hîzbûllahî ra ameyo remnayîş. 33 serrî yo ke ma persenê; çira na îdia baş nêameya teqîbkerdene? Çend serrî zî derbaz bibo ma do aqûbetê Nadîr Nayci bipersê.”
Mektubê lajê Nadîr Nayci, Ramazan Nayci ke Cizîre ra erşawito hetê Sercan Çalçi ra ame wendene.
‘Ma gorê pîyê xo wazenê’
Ramazan Nayci, mektube ke erşawito de ard vîr ke pîyê ey 33 serrî verê cû ameyo vîndîkerdene û wina vat: “33 serrî yo ke ez paweyê agahîye ya. Seba ke gorê ma çin o, no pawebîyayîş zî nêqedêno. Her roje hîs kena ke sankî do pîyê mi agêro. 33 serrî derbaz bîyî la ma dewlete ra tu hetkarîyêke nêdîye. Ma dewlete ra xeylî çîyan nêwazenê, tena cayê pîyê xo wazenê. Wa esteyan bidê, ma do bi destê xo pîyê xo bitemernê. Heqîqate û heqê gorî 33 serrî yo ke yeno taloqkerdene. Ma gorê pîyê xo wazenê.”
Çalakîye bi ronayîşê qerenfîlan yê Meydanê Galatasarayî qedîya.
