Dayîkê Şemeyî hewteyo 1128. yê çalakîya xo de aqûbeta Alî Tekdagî persayî ke 13ê teşrîna peyêna 1993î de ameybî destbendkerdiş û vîndîkerdiş.
Dayîkê/Merdimanê Şemeyî bi waştişê “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 1128. de Meydanê Galatasarayî yê Îstanbulî de çalakîya xo ya hewteyîye kerde. Dayîkê Şemeyî, endam û îdarekarê Şûbeya ÎHD’yî ya Îstanbulî û zaf pawitoxê heqanê merdiman tewrê çalakîye bîyî. Çalakîye de fotografê vîndîkerdeyan ameyî girewtiş. Çalakîya nê hewteyî de dayîkan aqûbeta Alî Tekdagî pers kerd ke 13ê teşrîna peyêna 1993î de ameybî destbendkerdiş.
Metnê eşkerayîye Merdima Şemeyî Umît Dîşlî wend.
‘19 rey ame destbendkerdiş û îşkenceyan reyde ribirî mend’
Umît Dîşlî dîyar kerd ke Alî Tekdag serra 1982î de bi maneya ‘endamîya rêxistine’ ame destbendkerdiş û 3 serrî hepisxane de mend. Aye wina va: “Seba ke polîsan her roje erzayêne keyeyê ey ser, dima mecbur mend û koç kerd Îzmîr. La demêko nêzdî de agêra Amed. Badê ke agêra Amed, tehdîdê polîsan ê ser dewam kerdî. 12ê sibata 1993î de birayê ey Mehmet Tekdag ame kiştiş. Alî Tekdag 13ê teşrîna peyêna 1993î de wexto ke cinîya xo reyde Berê Koyî de bî, hetê 4 kesan ra ke destê înan de telsîz est bî, ame destbendkerdiş. Alî Tekdag hetanî roja ke ame vîndîkerdiş pêro 19 rey ame destbendkerdiş û îşkenceyan reyde ribirî mend.”
‘Alî Tekdagî vatêne: Keyeyê mi rê xeber bidê, ez do bêra kiştiş’
Umît Dîşlî îfade kerd ke wexto ke Alî Tekdag ame destbendkerdiş, nêzdîyê cayê hedîseyî polîsê trafîkî bîyî la înan tu çî nêkerd. Aye wina va: “Hatîce Tekdage muracatê Dadgeha Emnîyetê Dewlete kerd la va ke hedîse newe yo, dima bê. Badê 3 rojan her roje şîye la tu agahî nêdayî. Seyfettîn Demîr ke eynî wextî de Alî Tekdagî reyde ameybî destbendkerdiş, rojnameya Ozgur Gundemî rê qisey kerdbi û vatbi: ‘Ez Alî Tekdagî reyde ameya destbendkerdiş û Alî Tekdagî vatêne keyeyê mi rê xeber bidê, ez do bêra kiştiş.’ La dozgerîye va: Tena dosyaya Seyfettîn Demîrî esta la dosyaya Alî Tekdagî çin a. Endamêkê JÎTEM’î dima qisey kerdbi û vatbi ke 120 rojî Alî Tekdagî rê îşkence ame kerdiş û dima ey berdê, rayîrê qezaya Farqînî ya Amedî ser o eştê. Keyeyê Tekdagî muracatê Dadgeha Heqanê Merdiman a Ewropa (DHME) kerd û dadgehî Tirkîya mehkûm kerde. Rixmê naye zî Alî Tekdagî ra agahî nêameye girewtiş.”
Çalakîya meydanî bi ronayîşê qurnefîlan qedîya.
