Amed – Serekê Komîteya Nuştoxan a seba Aştîye ya Merkezê PEN’a Kurd Omer Fîdanî derheqê Konferansê Edebîyat û Aştîye de qisey kerd. Omer Fîdanî dîyar kerd ke amancê înan ê nê konferansî no yo ke çimêko hîrêyin bikewo Prosesê Aştîye û Komelê Demokratîkî.
PEN’a Kurd 6 û 7ê teşrîna peyêne de Amed de bi tewrbîyayîşê zaf nuştox, roşnvîr, şaîr û sîyasetmedaran Konferansê Edebîyat û Aştîye keno. Omer Fîdan endamanê komîsyonê hedrekerdişî yê konferansî ra yew o. O hem zî Serekê Komîteya Nuştoxan a seba Aştîye ya Merkezê PEN’a Kurd o. Omer Fîdanî derheqê konferansî de Ajansê Welatî rê qisey kerd.
‘Sey roşnvîran ma wazenê seba prosesî vateyê xo vajê’
Omer Fîdanî da zanayîş ke amancê înan o yewin ê nê konferansî no yo ke naskerdişê mabênê nuştoxanê kurdan û nuştoxanê bîyanîyan xurt bibo. Ey wina va: “Bakurê Kurdîstanî de prosesêk est o û ma ci rê vanê prosesê pîyaroniştişî. Çunke hema aştîye nêvirazîyaya. Ma sey roşnvîr û nuştoxanê kurdan wazenê ke nê prosesê pîyaroniştişî de vateyê xo vajê. Proses de çimêko hîrêyin çin o. Ma sey nuştox û roşnvîranê kurdan û dinya wazenê ke proses de sey wijdanê komelî, sey çimêko komelkî bibê çimêko xozayî.”
‘Seba na xebate ganî şertê Kurdîstanî munasib bîyêne’
Omer Fîdanî dîyar kerd ke înan seba nê konferansî xebatêka derg û hîraye kerda. Ey qiseykerdişê xo wina dewam kerd: “Ma seba nê konferansî xebatêka derg û hîraye kerde. Hem zî seba ke no konferans bêro ca, ganî şertê Kurdîstanî seba naye munasib bîyêne. Verê nika zî ma çend reyî cehd kerd ke xebatêka winasî bikerê. La sefaretxaneyanê nuştoxanê dinya vatêne ke rewşa Kurdîstanî hetê emnîyetî ra munasib nîya. Coka ma nêeşkayêne xebatêka winasî bikerê. Na xebate de ma cehd kerd ke heme sazgeh û dezgehanê şaristanî bikerê mîyanê hewldayîşêk û bimojnê ke no şaristan seba xebatêka winasî hedre yo.”
‘Ma do cehd bikerê ke têkilîyanê dîplomatîkan xurt bikerê’
Omer Fîdanî ard ziwan ke ê do bi nê konferansî cehd bikerê ke roşnvîranê dinya reyde têkilîya dîplomasî xurt bikerê. Ey qiseykerdişê xo wina qedêna: “Konferans do di rojî dewam bikero. Roja yewine de ma do cehd bikerê ke bimojnê têkilîya edebîyat û aştîye do senî bibo. Hem zî roşnvîrî do seba aştîye vateyê xo vajê. Roja dîyine ma zafêr seba averberdişê dîplomasî ya bi nuştoxanê dinya reyde cîya kerda. Roja dîyine de ma do kesanê ke welatanê teberî ra ameyê, şaristan de bigêrnê û têkilîyanê xo yê şexsîyan û dîplomatîkan înan reyde xurt bikerê.”
