DTSO pîya bi Weqfa Mezopotamya do tewr tay 5 hezar çekuyanê ekonomî yê Kurdkî bîyaro pêser.
Odeya Bazirganî û Endustrî yê (DTSO), semedê ke warê aborî, bazirganî û cîhana karsazî de şuxulnayena Kurdkî aver bera, yew xebata hîra ya termînolojî da destpêkerdene. Bi protokola ke pîya bi Weqfa Mezopotamya ra ameya îmzekerdene, tewr tay 5 hezar çekuyê ekonomî do serê bingeha Kurdkî (Kurmanckî) bêrê destgirewtene û pîya bi ziwananê Tirkî, Farsî, Erebî û Îngilîzî “Ferhenga Têgehanê Aborî ya Kurdkî” ya 5 ziwanan bêra amadekerdene.
Çekuyê ke warê ekonomî, fînans, berardiş û bazirganî de cîhana karsazî dana şuxulnayene, bi xebatê akademîsyen û pisporanê ziwanî do bêrê arêdayene û bi nê qeydeyî Kurdkî do bibo wayîra termînolojîyeka dewlemende. Bi nê xebatî ke do tede ferhengê aborî yê mîyanneteweyî bêrê cipersayene, yeno armançkerdene ke Kurdkî tayêna bi hêz û standart cuya aborî de ca bigiro.
‘Ma do termînolojîya Kurdkî tayêna bi hêz bikerê’
Endamê Desteya Rêberîya ke DTSO de berpirsîyarê Xebatanê Ziwan û kulturî yo, Farûk Korkmaz, derheqê xebata termînolojîya ekonomî ya Kurdkî de va ke ziwanê Kurdkî wayîrê tarîx û kulturêka dewlemende yo û wina dewam kerd: “Ewro ma wazenê ke cuyê ekonomî de zî çekuyê Kurdkî tayêna zaf bêrê şuxulnayene. Ekonomî, bazirganî, berardiş û waranê bînan de ma do pîya bi pisporan tewr tay 5 hezar çekuyê Kurdkî yê termînolojî zêde bikerê. Averşîyayena yew ziwanî, her warê cuyî de bi berardiş û şuxulnayena çekuyan mimkun bena.”
