Rêzeyê dîyine yê “Vengê Vîyartoxî: Konseranê Amîda”, ke rêzeyê yewine de tarîxê Amedî bi muzîkê kurdkî ra piya arde, dest pêkeno. Konserê rêzeyê neweyî do cayanê tarîxî yê Kurdîstanî de bêrê viraştiş.
“Vengê Vîyartoxî: Konseranê Amîda”, ke cayanê tarîxî yê cîya-cîyayan yê Amedî de ameyê viraştiş, bi rêzeyê dîyine dewam kenê.
Rêzeyê neweyî do cayanê kulturî yê şaristananê herême, eseranê muzîkî û hunermendanê taybetî yê dorûverê ke tede dîyalekt û şêwazanê fekî yê cîya-cîyayan yê kurdkî yenê qiseykerdiş zî şumul keno. Faruk Korkmazî, endamê Heyetê Rayberan ê Odeya Bazirganî û Endustrîye ya Amedî (DTSO) û verpersê karanê ziwan û kulturî, derheqê rêzeyê newe yê konseran de agahî da û va ke no proje bi ramanê viraştişê konserêk seba vîrardişê Aram Tîgranî dest pêkerdo.
Korkmazî dîyar kerd ke pêşnîyazê viraştişê çalakîye, ke tede eserê Aram Tîgranî bêrê wendiş, çarçewaya Konseranê Amîda de ameyê rojevî. Ê va ke înan nê fikrî ra hereket kerdo û qerarê înan o bîyo ke rêzeyê dîyine yê konseran bi hawayêko ke mal û mulkê kulturî yê şaristananê herême zî şumul bikero, saz bikerê.
Vîyarte ra heta ewro ame
Korkmazî, derheqê rêzeyê yewine yê Konseranê Amîda de erjnayîşêk kerd û wina va: “Çarçewaya ‘Vengê Vîyartoxî: Konseranê Amîda’ de, cayanê tarîxî yê ke mîyanê înan de Şikeftê Hasunî yê Farqînî, Kelaya Zerzevanî, Şikeftê Hilarî yê Erxenî, Pirê Malabadî yê Farqînî, Dêrê Keldanîyan ê Sûrî û Kelaya Gêlî zî est ê, pêroyî 7 programê konseran ca ardî. Her konserêk ma seba yew hunermendê hêja yê muzîkê kurdkî ame viraştiş û eserê înan ame wendiş. Ma rêzeyê konseran platformanê dîjîtal ser o zî vila kerd. Amancê ma yê na xebate ke xeylî balê merdiman ant, o bî ke mal û mulkê tarîxî, deyîr û awazê muzîkê kurdkî ke vîyarte ra heta ewro reseyê ma û hunermendanê ke eserê hêja dayê nê muzîge nas bikerê; sewbîna dewlemendîya taybetî ya kulturî ya şaristanî û herêmê ma bi rayîranê cîya-cîyayan biresnê merdiman.”
Rêzeyê neweyî bi Aram Tîgranî dest pêkenê
Korkmazî dîyar kerd ke înan na serre xebate bi amancê vîrardişê Aram Tîgranî dayo destpêkerdiş û va ke rêzeyê neweyî yê Konseranê Amîda do taybetmendîyêka herême bigêro xo ser. Korkmazî wina va: “Ma wazenê bi Aram Tîgranî dest pêkerê û cayanê tarîxî yê ma de dewam bikerê ke hunermendanê ma yê ke vîrê muzîkê herême de ca girewto û eserê taybetî verdayê, û eserê înan vajê û bidê eşnawitiş. Rêzeyê yewine de ma tena bi Amedî de sînordar mendê. Nê dewê neweyî de ma do bala xo bidê mal û mulkê kulturî yê şaristananê herême, eserê taybetî yê muzîkê kurdkî yê her cayî û hunermendanê înan. Bi nê nêzîyayîşî ma qerar da ke rêzeyê dîyine ya ‘Vengê Vîyartoxî: Konseranê Amîda’ bidê destpêkerdiş.”
Eserê Aram Tîgranî
Korkmazî agahî da ke, sey rêzeyê verêne, no rêzeye de zî înan bi Ma Musicî rê hemkarî kerdo. Ê sewbîna va ke çarçewaya Fuarê Kitaban ê TUYAP’î yo ke na serre raya 10. yeno viraştiş de, bi hemkarîya DTSO û Ma Musicî, panelêko taybet do bêro viraştiş ke tede eserê Aram Tîgranî û tewrbîyayîşê ey yê muzîkê kurdkî de bêrê munaqeşekerdiş.
Panelê bi namê “Vengê Azadîye, Sembolê Biratîye: Aram Tîgran” do 2ê teşrîna verêne 2026î de, mabenê saetanê 13.00 û 13.45î de, bêro viraştiş.
