DTSO Weqfa Mezopotamya reyde do tewr tayê 5 hezar çekuyanê ekonomî yê Kurdkî bîyaro pêser. Rayberê DTSO’yî Farûk Korkmazî derheqê xebate de wina va: “Ganî ma bi ziwanê xo karanê xo bi ca bîyari. Ganî heme sazgehê ma xo rê no çî bikerê amanco yewin.”
Odeya Endustrî û Bazirganîye yê Amedî (DTSO), seba şuxulnayîşê kurdkî warê ekonomîye, bazirganî û dinyaya karsazîye de hêzdar bikerê, xebatêka hîra ya termînolojî da destpêkerdiş. Bi protokolê ke Weqfa Mezopotamyaye reyde ame îmzekerdene, nêzdî 5 hezar çekuyê ekonomîye do bingeya kurdkî (kurmancî) ser o bêro kerdîş û tewlê ziwanê tirkî, farisî, erebî û îngilîzî do “Ferhengê Termanê Ekonomîye yê Kurdkî” ya bi 5 ziwanan bêro hedrekerdiş.
Ekonomîye ra heta fînansî, berardişî ra heta bazirganîye, bi hezaran termê ke dinyaya karsazîye şuxulnenê, do bi xebata akademîsyen û pisporanê ziwanî rê, kurdkî bibo wayîrê termînolojîyêko dewlemend. Bi xebata ke ferhengê ekonomîye yê mîyanneteweyî do bêrê cigêrayiş, yeno amanckerdiş ke kurdkî cuyayîşê ekonomî de bibo wayîrê warêko hêzêr û standard.
Rayberê DTSO’yî Farûk Korkmazî derheqê projeyê Ferhengê Termanê Ekonomîye yê Kurdkî ajansa ma rê qisey kerd.
‘Nêzdî 5 hezar û 7 çekuyê ekonomîye ameyê komkerdiş’
Farûk Korkmazî dîyar kerd ke xebatanê xo yê DTSO’yî bi ziwanê kurdkî û tirkî rayra benê û va: “Odeya Bazirganîye her di ziwanan pîya şuxulnenê. Tîya de ma kêmîyêk dî, venganîyêk dî. Venganî çi bi? Çekuyanê ekonomîye de kêmîyêko pîl ma dî. Nê warî de heta nika çar perçeyanê welatî de xebatêka akademîk yan zî xebatêka çapkerdişî nêamaya rayraberdiş. Nêzdî serrêk Weqfa Mezopotamyaye reyde ma xebate rayra benê. Ma Wan de komxebatêk viraşt. Goreyê netîceya na komxebate, çarçewaya nê karî vejîya meydan. No çi bo? Nêzdî 5 hezar û 7 qçekuyê ekonomîye ameyê komkerdiş.”
‘Xebata ekonomîya kurdkî de xeylî kesî ca bigêrê’
Korkmazî dewamê qiseykerdişê xo de dîyar kerd ke înan xebata ferhengî nêzdî serrêk û nêm rayra berda û va: “Badê komxebata ma ya Wanî, ma Amed de di yan zî hîrê rey komxebate pîya rayra berd. Di rey Îstanbul de û Başûr de zî ma xebatêk bi no hawa rayra berd. MA çar perçeyanê welatî de, kesê ke nê warî de verê cu xebatî kerdê, do xebatê ma de ca bigêrê, ma do înan ra hetkarîye bigêrê. Reyna kesê ke teberê welatî de cuyenê, Ewropa û dîaspora de cuyenê, ma do înan ra zî hetkarîye bigêrê. Amancê ma no yo ke warê ekonomîye de, warê ekonomîya kurdkî de standardîzasyonêk biyarê meydan. Ma bi nê amancî xebatan kenê.”
‘Ganî heme warê cuyayîşî de xebatê ziwanî bêrê kerdiş’
Korkmazî va ke tena warê bazirganîye de nê, ganî heme waranê cuyayîşî de xebatê ziwanî bêrê kerdiş û qiseykerdişê xo wina qedêna: “Ganî ma bi ziwanê xo karanê xo bikerê. Bi no hawa ganî heme sazgehê ma xo rê nê çî bikerê amanco yewin. Ez bawer kena ke ameyoxî de zî no ziwan reyna bikewo mîyanê bazarê ma. Seba ziwanî, seba ameyoxê ziwanî no çî hewceyo.”
