Parlementerê Colemêrgî yê DEM Partî Vezîr Coşkun Parlak, bale ant polîtîkayanê şerê taybetî yê Colemêrgî ser o û dîyar kerd ke amancê nê polîtîkayan domnayîşê ‘konsepta Dêrsimî’, asîmîlasyon û şikiştişê îradeyê şarî yo.
Colemêrg herêmêka stratejîk a ke sînorê Îran û Îraqî de ya. Dewleta tirkan her tim nê şaristanî de polîtîkayê taybetî rayra berdî û dimayê îqtîdarê AKP’yî zî na rewşe vila bîye. AKP’yî sazgehê dewlete girewtê binê kontrolê xo û seba menfatanê xo şuxulneno.
‘AKP’yî heme sazgehê dewlete girewtê binê fermanê xo’
Vezîr Parlakî dîyar kerd ke AKP her çîyî tena qerar dano û vat: “2013î ra nat AKP’yî heme sazgehê girewtê binê fermanê xo. Seserrî yo ke bi çimê ‘ewlekarî’ şaristananê ma ra ewnîyenê. Ma vanî, Colemêrg bêwayîr nîyo. Eke ma tîfaqê xo xurt bikerî, ma eşkenê dewlete mecbur bikerî ke herinda polîtîkayanê ewlekarî xizmet bikero.”
‘ÎŞKUR sey sazgehêkê propagandayê AKP’yî xebitîyena’
Vezîr Parlakî serê ÎŞKURî de zî wina vat: “ÎŞKUR nika sey buroyê propagandayê AKP’yî xebitîyena. Kesê ke sîyasetê AKP’yî de ca gênê, sey xelate meaş gênê. Labelê şarê feqîr û bi rûmetî rê kar nîno dayene. Amanc o yo ke îradeyê şarî tasfîye bikerî. No eyn sey konseptê Dêrsimî yo ke ewro Colemêrg û Şirnex de sey laboratuarî şuxulnenê.”
‘Amancê qeyûmî xizmet nê, darbe yo’
Derheqê qeyûman de zî Vezîr Parlakî wina vat: “Heşt serrî yo şaredarîyî destê înan de yê, labelê nêwazenê kurdî xo bi xo xo îdare bikerî. Eke şaredarîyî destê ma de bîyênê, ewro şarê Colemêrgî awa lêmine nêşimitêne. Amancê qeyûmî xizmet nîyo, darbe yo.”
‘Dadger û dozgerî sey mîlîtanê AKP’yî xebitîyenê’
Vezîr Parlakî bale ant cezaya ke dabi Mehmet Siddik Akişî ser o û vat: “Dadger û dozgerî sey mîlîtananê AKP’yî xebitîyenê. Dosyaya ke 2009î de bi destê cemaatî ameybî akerdene, ewro AKP na dosya ra ceza dana. Delîlê înan çin ê, tena qiseykerdişê telefonî yê bi Kurdkî şaş açarnayî û kerdê delîl.”
‘Bi kerdişanê xo prosesî sabote kenê’
Vezîr Parlakî dîyar kerd ke îqtîdar verê çareserîye gêreno û vat: “Bi tayînkerdeişê qeyûman nê prosesî sabote kenê. Wazenê şarî xeta înan ra dûrî fînê. Labelê embazê ma yê hepisxaneyî serê xo çewt nêkenê. Ma do bi sîyasetê demokratîkî ser kewî.”
‘Konseptê Dêrsimî’ yeno rayraberdene’
Vezîr Parlakî tewr peynî de wina vat: “Nisbetê xokiştişî Colemêrg de zaf berz o. No tesaduf nîyo, goreyê ‘Konseptê Dêrsimî’ yo. Amanc asîmîlasyon û şikitişê îradeyê komelkşî yo. Wazenê şarê Kurdî xeta înan a exlaqî-polîtîkî ra dûrî fînê.”
