Wezaretê Perwerdeyî yê Tirkîya seba asîmîlasyonê gedeyan 56 mamosteyan erşaweno rojavayê Kurdîstan û Sûrîye.
Dewleta tirkan bi desan serrî yo her hetî de xebatanê asîmîlasyonî şarê kurdî ser o rayra şêro. Dibistananê seretayî ra heta unîversîteyan gedeyê kurdî polîtîkayanê asîmîlasyonî reyde rî bi rî manenê. Mudirîyetê Pêroyî yê Perwerdeyê Teberê Tirkîya ke binê banê Wezaretê Perwerdeyî yê Tirkîya de xebatan keno, rayberê mamosteyanê ke do bierşawo teberê Tirkîya weşana. Goreyê rayberê dewleta tirkan do xeylê mamosteyanê asîmîlasyonî bierşawê rojavayê Kurdîstanîû Sûrîye.
56 mamosteyê asîmîlasyonî yê gedeyan
Goreyê raybera Wezaretî ke keypelê xo yê fermî de weşanayo; dewleta tirkan do 56 mamosteyan bierşawa Sûrîye û rojavayê Kurdîstanî û mamosteyê ke do şîrê şaristananê kurdan do polîtîkayanê asîmîlasyonî berê teberê vakurê Kurdîstanî zî.
Yeno zanayene ke do mamosteyanê asîmîlasyonî bierşawê Efrîn û Serêkanîyê
Goreyê rayberî ke ameyo weşanayene, nêyeno dîyarkerdene ke nê mamosteyê asîmîlasyonî do kamcîn şaristanan de bêrê wezîfedarkerdene la dewleta tirkan demo ke şaristanê Kurdîstanî yê sey Efrîn û Serêkanîyê îşxal kerdê, nê şaristanan de dest bi awankerdişê dibistananê perwerdeyîya tirkî kerdbî. Yeno zanayene ke do nê mamosteyê asîmîlsayonî nê şaristananê kurdan de bêrê wezîferdarkerdene.
Beşê Unîversîteya Dîlokî Efrîn de se keno?
Dewleta tirkan xebatanê asîmîlasyonî tena bi rayîrê erşawitişê mamosteyan nêkeno, eynê wextî de awankerdişê Fakulteya Perwerdeyî yê Efrînî ke binê banê Unîversîteya Dîlokî de ameya awankerdene, polîtîkayanê asîmîlasyonî hîra keno.
