Serekkomarê Tirkîya Tayîp Erdogan, Prensê Erebîstana Seûdî Muhammed bîn Selman û Serekwezîrê Pakîstanê Şehbaz Şerîf Mekke de peymana hempar a pawitişî îmza kerd.
Serekkomar Erdogan seba karanê rojane şi Erebîstanê Seûdî. Wezaretê Karanê Teberî yê Pakîstanî eşkera kerd ke Tirkîya, Erebîstanê Seûdî û Pakîstanî reyde peymana pawitişî ya hempar a bi nameyê ‘Peymana Mekke’ îmza kerda. Rayberîya Îslamabadî ya Pakîstanî dîyar kerd ke eke hêrişêk vera nê her hîrê welatan bêro kerdene, do vera hêzê hêrişkar pawitiş bi hawayêko hempar bêro kerdene.
Hewceyê vatişî yo ke Erebîstano Seûdî zengînê petrolî yo, Pakîstan wayîrê hêzê nukleerî yê herêmî yo û Tirkîya zî hem wayîrê dîyin artêşa gird a NOTA’yî ya û hem zî hetê teknîkê şerî û pawitişî de xo aver bena.
Peymane nê wextê ke Îran hêrişê binawanîya Erebîstanê Seûdî keno de ameye îmzakerdene. Wina aseno ke Erebîstano Seûdî wazeno hem pawitişê xo xurt bikero û hem zî vera Îranî îttîfaqêk awam bikero. Balkêş o ke peymane demêkê de ke Tirkîya û Îsraîl yewbînan reyde reqabet kenê, ameye îmzakerdene.
