DBP’î bi wesîleya 15ê Gulane Roşanê Ziwanê Kurdkî beyanato nuştekî da. Beyanat de ame vatiş ke bi ziwananê xo yanê dayîke biciwîyê, ganî no têkoşîn pêl bi pêl parzemînanê dinya de vila bibo.
Komîsyonê Partîya Herêmanê Demokratîkan (DBP) bi wesîleya 15ê Gulane Roşanê Ziwanê Kurdkî beyanato nuştekî da.
Beyanat wina yo:
“Bi hêvîya ‘şaranê dinya reyde bi ziwanê xo yê dayîke biciwîyê’ ma 15ê Gulane Roşanê Ziwanê Kurdî Fîraz Kenê!
Roşanê Ziwanê Kurdî têna wareyê ziwanî de nê, eynî dem wareyê xoverdayîşê kulturî û sîyasî de sey nîşaneyê têkoşînê estbîyayîşî rojdemê şarê kurdî de ca geno.
Çike destpêkê seserra yewin a komare ra heta nika binê sîya “ferasetê yewperestî” de ziwanê kurdî çin ame hesibnayene. Bi polîtîkayanê teda û înkarî yê serê ziwanê kurdî qedexe, sansur, astengîye bi hawayêko sîstematîk kewtî merîyet. Vera ziwanê kurdî înkarkerdiş û dişmenîye ramîyayî, her hela tarîxî de bi destê îşxalkeran sey polîtîkaya dewlete derbasê seserra dideyine bîyî. Nêqebûlkerdişê perwerdeyê bi ziwanê dayîke zî nîşaneyê tewr zelal ê konseptê înkarî yo. No konsept heman wext nîşaneyê dişmenîya vera nasnameyê kurdî û nasnameyê şaran o.
Hemverê înkar û tedaya seserre, ziwanê kurdî têkoşînê xo yê estbîyayîşî heta ewro ramino. Bêguman bingeyê nê têkoşînî de fedekarîyê giranî, besteyîyê neteweyî û reftarê azadîye ca genê. La ma vanê ke “bes nîyo.” No têkoşîn pêl bi pêl pîl bibo ke ziwanê kurdî û pêro ziwanê şaran wayîrê ameyoxêkê azadî bibê.
Coka sey her dem ma yewna dîyar kenê ke; ziwan vîr o, kultur o, tarîx û nîşaneyê estbîyayîşî yo. Wayîrvejîyayîşê ziwanê dayîke, pawitişê ercanê estbîyayîşî yo. Ameyoxo hempar, têduşt û azad bi naskerdişê ziwananê dayîke yanê şaran mumkun o. Têkoşîno ke ewro şarê kurdî seba ziwanê xo ramino, eynî dem de seba pawitişê pêro ziwananê dayîke têkoşînêko hempar o. Yew zî, qiseykerdiş û perwerdeyê bi ziwanê dayîke zî heqo tewr esasî yo. Ma nê waştişê heqdarî reyna roja ewroyêne de sey vengdayîşê komelkî anê ziwan.
Seba awankerdişê ameyoxo ke ma bi ziwananê xo yanê dayîke biciwîyê, ganî no têkoşîn pêl bi pêl parzemînanê dinya de vila bibo. Bi na hêvîye ma reyna 15ê Gulane Roşanê Ziwanê Kurdî fîraz kenê û hewt serre ra heta hewtay serre veng danê her kesî ke ma do wayîrê ziwan û ameyoxê xo bivejîyê.
Heyetê Caardişê Merkezî yê DBP’yî”
