AKP proseso ke Tirkîya de domyeno peygoş keno. Xeylê mintiqayanê Sûrîye de bi xususî Dêra Zorê de, seba tasfîyekerdişê qezencanê kurdan ê Rojawan de, çalakîyê lobîye yê ereban keno.
Dewleta Tirkîya bi hetkarîya komanê çekdar û eşîrê rejîmê Esed û Artêşê Pasdarê Şorişê Îranî, polîtîkayanê xo yê herakerdena Sûrîye de, bi xususî Dêra Zorê de, domneno. Her wina hewl dano ke nê koman hetê lojîstîkî û lejkerî ra newe ra organîze û fînase bikero ke vera QSD’î de hêrişan bido destpêkerdene û qezencanê kurdan tasfîye bikero.
Goreyê xebera lekolin.orgî heyetê AKP’î yo ke raşteraşt hetê Erdoganî ameyo destûrkerdene hewteyo vîyarte serdayîşê Dêra Zorê kerdo û bi şêxê Eşîra Êgêdatî reyde kom bîyo. Mîyanê heyetê Tirkîyaye de rayedarê AKP’î Hasan Balci, Suleyman Zahreddîn Kadûr û rayberê weqfa hetkarî ya Dewleta Tirkîya ya Sûrîyeye de Mert Serînkan, bîyê. Ame musayene ke Şêx Musab, Îbrahîm û Samî El Hîfîl bi ser nameyê Eşîra Egêdatî beşdarî kombîyayîşî bîyê.
Şerê plankerde yê vera QSD’î de
Armancê heyetê AKPî yê şîyayîşê Dêra Zorê seba pêvînayîşê bi şêxanê eşîra Egêdatî ra nê bi ke dima sozê Tirkîyaye yê dabikerdena çek û hetkarîya lojîstîkî ya eşîran ra, eşîran agahdar biko ke beşdarî şerê plankerde yê vera QSDî de bibê.
Dewleta Tirkan planê xo yê hêrişkerdişê vera QSDî de bi hembarî bi komanê çeteyi yê girêdayî MÎT’î ra domneno ke bi rayîrê HTŞ’î binê nameyê “Artêşê Eşîran” de herême de bi ca kerda ke raya pêroyî bixapîno û eşîranê ereban sey dişmenê Rayberîya Xosere û QSD’î nîşan bido. Na verdewamîya polîtîkayanê ci yê afirnayena temîyanî ya mezhebî mabenê ereb û kurdan de, bêîstîqrarkerdena înan a herêmî û tecrîdkerdişê kurdan o. Dewleta Tirkan wazena kaosî ra hawil biga û armanc kena ke herêmanê xo îşxalkerdene zafêr hera bikera.
