Wîlayetê Kordofanî yê vakurê Sûdanî de, hêrişê teyareyê bêmerdimî (ÎHA) yê Hêzanê Piştîdayîşê Lezî (RSF) de 9 sîvîlan cuya xo vîndî kerd, 14 kesî zî birîndar bîyî.
Şerê mabenê artêşê Sûdan û Hêzanê Piştîdayîşê Lezî (RSF) dewam keno. Her ke şino hûmara merdeyan û krîzê merdimîye giranêr beno.
Goreyê agahîyanê ke çimeyê tibbîyan dayê, hêrişo ke bi teyareyê bêmerdimî (ÎHA) yê Hêzanê Piştîdayîşê Lezî (RSF) yê dewa El-Cemame yê wîlayetê Kordofanê vakurî ser o ameyo kerdene, 9 sîvîlan cuya xo vîndî kerda, 14 sîvîlî zî birîndar bîyî.
Badê hêrîşê El-Cemame, vakurê rojava yê şaristanê Bara de, rêxistina heqanê merdiman zî bale ante binpaykerdişê heqanê sîvîlan ê herême ser o.
Grûbê “Avukatanê Rewşa Lezabezîye” eşkera kerd ke endamanê RSF’yî, hêrişê sîvîlan û keyeyan kerdo û bazarê El-Cemame de zî talan û texrîbat kerdo.
Şîdetê pêkewtiş reyna zêde bi
Pêkewtişê mabenê artêşê Sûdan û RSF’yî, badê ke rêxistine kontrolê xo herêma Darfurî ya rojavayê welatî de hîra kerd, reyna bi şîdet bi.
Goreyê daneyanê Neteweyanê Yewbîyayeyan (NY), destpêkê serre ra nat, taybetî şuxulnayîşê teyareyanê bêmerdiman yê RSF’yî ver, seranserê welatî de zêdeyî hezar kesan cuya xo vîndî kerd.
Şerê zerreyî yê Sûdanî ke nîsana 2023î de dest pêkerdo, bîyo sebebê hezaran kesan ke cuya xo vîndî kerda yan zî birîndar bîyî. Sewbîna nêweşxane, rayîr, binawanîya ceyranî û awe zî zerarêko gird dî.
Pêkewtişî ra ver, bi mîlyonan kesî bêçare mendê ke keyeyanê xo ra vejîyê. Eynî wextî de rêxistinê mîyanneteweyî îqaz kenê ke krîzê merdimîye her ke şino zêde beno.
