Endama Konseya Hemserekîya Pêroyî ya KCK’yî Sozdar Avesta dîyar kerd ke sey Têgêrayîşê Azadîye serra peyêne de gamê tarîxî eştî û vat ke seba ke proses bireso serkewtişî, ganî herkes berpirsîyarî bigîro.
Endama Konseya Hemserekîya Pêroyî ya KCK’yî Sozdare Avesta serrgêra feshê PKK’yî de derheqê serra peyêne de erjnayîşî kerdî.
Avesta vat ke şarê ma destpêkê prosesî de bi şik bî û feshê PKK’yî nê no şik hîna zêde kerd. Avesta vat: “La şarê kurdan goştarîya Rayber Apoyî kerd. Têgêrayîşê Apoyîyan reyna îsbat kerd ke PKK tena partîyêka sîyasîye ya ferdî nîya. PKK ruhê têkoşînî, felsefe û cuya azad a. Bawerîya ma bi Rayber Apoyî û nirxanê ey ra tam a.”
Avesta dîyar kerd ke proses bi yewhetî aver nêşino û vat: “No proses tena sey prosesê mîyanê Têgêrayîşê ma û dewleta tirkîya nêyeno destgirewtene. No proses problemanê komel, şar û herême pîya çareser keno. Bawerîya ma û vengdayîşê ma o yo ke wa nê prosesî rê hîna zaf wayîr vejîyê. No proses bi dîyarbîyayîşê statuyê huqûqî û sîyasî yê Rayber Apoyî eşkeno aver şêro. Wayîrê nê prosesî Rayber Apo yo. Ganî lezabez vernîya Rayber Apoyî bêro akerdene.”
Cinîyî hêzê pêşengê prosesî yê
Avesta ard ziwan ke destpêkê prosesî ra nat cinîyan têkoşînêko gird dayo. Avesta vat: “No bî wesîle ez reyna têkoşînê cinîyan selam kena. Rojanê peyênan de cinîyan rayîrşîyayîşê Gemlîkî viraşt û bale ante prosesî ser. Cinîyî dewam kenê ke pêşengîya prosesî bikerê. Sey Têgêrayîşê Azadîye, kampanyaya ke ma seba azadîya fîzîkî ya Rayber Apoyî daya destpêkerdene, dewam kena. Aşma hezîrane de dosyaya heqê hêvî do bêro rojeva Komîteya Wezîranê Konseya Ewropa û demo ke înan dayo dewleta Tirkîya do biqedîyo. Seba caardişê heqê hêvîye yê Rayber Apoyî, ganî heme warê têkoşînî de çalakî û aktîvîteyî virazîyê.”
Avesta peynî de vat: “Têgêrayîşê Apoyîyan têgêrayîşêko 50 serran o. Heme warî de sazgehê ma est ê. Çimê heme kesî Têgêrayîşê Apoyîyan ser o yo. Têgêrayîşê Apoyîyan ke serrêko nê prosesî îdare keno, do nika ra dima zî kar û barê xo bikero. KCK do dewam bikero ke seba serkewtişê prosesî kar û barê xo bikero.”
