Badê ke PKK’yî qerarê kongreya xo îlan kerd, Serşêwirmendê Serekkomarî Mehmet Uçumî eşkerayîyêk daye û vat: “Qadanê demokrasî û huqûqî de reformê hîrayî do bêrê kerdene.”
Şarê Kurdî badê vengdayîşê tarîxî yê Abdullah Ocalanî yê 27ê sibate, Kongreya PKK’yî ya 12. kom kerde û qerarê tarîxî girewtî. Wexto ke qerarî bîyî rojevê sîyasetê Tirkîya û dinya, Serşêwirmendê Serekkomarî AKP’yî Recep Tayyîp Erdoganî Mehmet Uçumî hesabê xo yê X’î de eşkerayî daye.
Vatişê ‘Seserra tirk û kurdan’
Uçumî dîyar kerd ke reformê hîrayî do bêrê kerdene û va: “Şarê Tirkîya û heme temsîlkaran reyde, tirk û kurdan vera emperyalîzmî de têkoşînê estbîyayîşî de şerê Xelasî kerd û Komarê Tirkîya awan kerd, hetanî ebedîyet qederê xo pîya tayîn kerd. Kurdî parçeyê bingeyin û awankerê Miletê Tirkî yê. Kurdî bi pênaseyê parçeyo ke Miletê Tirkî ra cîya nêbeno, awankerê Komara Tirkîya û wayîrê aye yê daîmî yê. Dewleta Komara Tirkîya Dewleta Milî ya Kurdan a zî. Seserra Tirkîya; Seserra tirk û kurdan a. Tam goreyê na paradîgma, pêro eşkerayîyî ke ameyê dayene nîşan danî ke qonaxo bingeyin ê ‘vîyartişê Tirkîyaya bêterore’ temam bîyo. Hem zî nê eşkerayîyî tesdîq û îlanê tarîxî yê yewbîyayîşê Kurdan ê Dewleta Komar Tirkîya û Miletê Tirkî yo.”
Vatişê ‘Qanûno bingeyinî yo newe’
Uçumî wina dewam kerd: “ ‘Tirkîyaya bêterore’ netîce nîya, destpêkêko newe yo. Resayîşê hedefê ‘Tirkîyaya bêteror’ û qedîyayîşê na qonaxe reyde seba Tirkîya qonaxêko berzbîyayîşê tarîxî dest pêkeno. Qonaxo newe do her hetan ra Tirkîya xurt bikero. Qabulê her kesî yo ke qadê demokrasî û huqûqî de reformê hîrayî bêrê kerdene, qonaxêko newe yo ke huqûqê demokrasîya neteweyî û welatperwer şênberbîyaye bêro vîyarnayene. Se ke aseno prosesê awankerdişî yo ke bi xelasî dest pêkerdo, bi îlanê Komare tescîl bîyo, bi ‘vîyartişê Tirkîyaya bêterore’ de sere de amadekerdişê qanûnê bingeyinî yo newe reformanê hîrayan reyde temam beno. Bi no qeyde Tirkîyaya ke awankerdişê xo temam kerdo, seserra dîyine ya Komare bi kerdişê aye yo Seserra Tirkîya resayîşê hedefî rê rayîrşîyayîşê xo yo gird bêasteng û do hîna xurt bidomna.”
