Stenbol – Hemserekanê Zimanxaneyî Hulya Darak û Aslan Demirî diyar kerd ke Stenbol de bi mîlyonan Kurdî est ê la qiseykerdişê Kurdkî kêmî yo û wina vatî: “Ziwanê Kurdkî binê tehlukeyêke girdî de yo. Zimanxane bi hawayê komunalî ame awankerdene. Wa şarê ma Zimanxane de kurdkî qisey bikero û biciwîyo. Amancê komele yo sereke dayîşê perwerdeyê bi Kurdkî yo. Ma bi raya na komele wazenê ziwan û tarîxê Kurdkî bimusnê.”
Stenbol de do 21ê hezirane de qezaya Umranîye de komeleya ziwanê Kurdkî ya bi nameyê Komeleya Cigêrayîş û Averberdişê Ziwan û Kulturê Kurdî (Zimanxane) bêra ronayene. Komele de do seba doman û ciwanan programê kulturî û Kurdkî bêrê viraştene. Hemserekê Zimanxaneyî Hulya Darak û Aslan Demirî derheqê awankerdişê komele de ajansê ma rê qisey kerd.
‘Wa şarê ma zî Zimanxane de kurdkî qisey bikero û biciwîyo’
Hulya Darak ard ziwan ke Stenbol de bi mîlyonan kurdî ciwîyenê la bi hezaran domanê kurdan nêeşkenê bi Kurdkî qisey bikerê û nê çiyî vatî: “Seba aye zî ma komeleyêke awan kenê ke domanê Kurdan bi ziwanê xo qisey bikerê. Ma bi raya na komele wazenê ziwan û tarîxê kurdkî bimusnê. Xebatê ma ver bi peynî şinê. Ma wazenê Kurdê ke Stenbol de ciwîyenê bêrê tîya û kurdkî bimusê. Tîya 3 sinifî estê, 2 sinifî seba kesanê pîlan, yew zî seba domanan o. Ma do tîya seba domanan şanoyan virazê, koroya domanan awan bikerê û xebatê kulturî bikerê. Ma nêwazenê tu kes bi zorî bêro tîya, ma wazenê bi keyfweşî her kes bêro tîya. Kesê ke bêrê tîya do ziwanê xo aver berê û winasî xo zî nas bikerê. Eke kesêk tarîxê xo bizano, ziwanê xo ra şerm nêkeno. Çike sîstem wazeno ciwanî ziwanê xo ra şerm bikerê. Domanê ke bêrê tîya do bimusê ke ganî qiseykerdişê ziwanê Kurdkî ra şerm nêkerê. Wa Zimanxane zî seba her kesî do hol bibo û Zimanxane bibo cayê de cîya. Wa şarê ma zî Zimanxane de kurdkî qisey bikero û biciwîyo.”
‘Ma pawenê ke şarê ma wayîrê Zimanxaneyî vejîyo’
Aslan Demirî zî dîyar kerd ke bi raya komunî komeleyêka wina vejîyaya meydan û nê çî vatî: “Ziwanê Kurdkî binê tehlukeyê girdî de yo. Verê çend rojan ez şîya dewe û uca de mi dî ke domanî kurdkî qisey nêkenê. Seba ke domanî ziwanê xo bimusê Zimanxane zî hewceyêko gird o. Ma do 21ê hezirane de bi hawayêko resmî komele awan bikerê. Ziwanê her miletî girîng o la ziwanê ma seba ma zaf muhîm o. Hema lehçeyê Kurdkî binê tehlukeyê girdî de yê. Mîyanê sîyasetî de zî ziwanê Kurdkî bîyo ziwanê selamdayîşî, no zî vernîya averşîyayîşê ziwanê Kurdkî de yo. Zimanxane bi hawayê komunalî ame awankerdene. Her kesî paştî daya ma, ma zî hêvî kenê ke şar paştî bido ma. Amancê komele yo sereke dayîşê perwerdeyê bi kurdkî yo. Ma paweyê şarê xo yê ke wayîrê Zimanxaneyî vejîyo.”
