Qezayanê Stenbolî Bahçelievler û Kuçukçekmece de seba şehîdanê têkoşîn azadîye programê yadkerdene amê viraştene. Keyeyanê şehîdan dîyar kerd ke ê bi şehîdanê xo sereberz ê.
Bi rayberîya MEBYA-DER’î ya Stenbolî, seba şehîdanê Têgêrayîşê Azadîya Kurdîstanî yê ke cayan û tarîxanê cîyayan de cuya xo ra bîyî, qezayanê Stenbolî Bahçelievler û Kuçukçekmece de programê vîrardişî ame viraştene. Keyeyê şehîdan, Dayîkê Aştî, aktîvîstê TJA, endam û rayberê partîyanê sîyasîyan, temsîlkarê dezgehanê sîvîlan û xeylê welatperwerî tewrê programanê yadkerdene bî. Bahçelievler de program bînaya DEM Partî de ame viraştene. Salona vîradişî de masayan ser o fotografê şehîdan û Rayberê Şarê Kurdî Abdullah Ocalanî û gulî ameyê ronayene. Salone de pankartê “Şehîdî Nêmirenê” ame daliqnayene. Program seba şehîdan bi deqeyêka rêzgirewtiş dest pêkerd. Dima ra keyeyanê şehîdan qisey kerd û dîyar kerd ke nê gedeyê înan şehîdê temamê şarê Kurdîstanî yê û wina vat: “Înan seba aştîye canê xo da. Seba aştîye ganî temamê şarê ma têkoşîn bikero. Ma bi şehîdanê xo sereberz ê.”
‘Şehîdan cuyêka newîye da ma’
Nedîm Yilmazî o ke dima 33 serran hepisxane ra veradîyayo qisey kerd û vat ke tarîxê Kurdîstanî de Kawayê Asinkar sembolê xoverdayîşî yo û wina vat: “La dima serranê dergan Kurdîstan kerd 4 leteyî û vist binê herre. Labelê têgêrayîşo ke binê serekîya Rayber Apo de bi têkoşînî û Kurdîstan binê herre ra vet. Şehîdanê ma vat ma deyndar ê. No felsefeyê ma yo. Bê naye rayîrêko bîn ma rê heram o. Embazê Serek Apo zî waşt ke bibê gedeyê şithelalî. Şehîdanê ma cuyêka newîye da ma. Têkoşîn raya şehîdan de beno. Bi sayeya şehîdan ma behsê aştîye kenê.”
‘Ma şehîdan xo vîr ra nêkenî’
Parlamenterê DEM Partî yê Stenbolî Cengîz Çîçekî zî dîyar kerd ke şarê Kurdî wayîrê rûmetêko pîl o û wina vat: “50 serran de 27 hezar şehîdî est ê. Zaf bifikirê, tena seba ke estbîyayîşê xo bipawo, 27 hezar ewladê xo vist binê herrî. Belê zehmet o, la ganî ma sey embazanê inan têkoşîn bikerê. Merdim yeno dinya û ciwîyeno. Ma zî wayîrê xoverdayîşêko 50 serrî yê, heqê ma yê azadîye zî esto. Eke bibo, cuyêka ma zî wa fedayê azadîya Kurdîstanî bo. Ma soz danê kesê ke têkoşîn ardê heta na aste, wa tu kes qet xo rê qehremanan nêgêro. Qehremanî Serek Apo û embazê ey ê. Qehreman şarê kurdî yo. Çîyo ke qehremanîye vejeno meydan, keda. Heta peynî ma şehîdan xo vîr ra nêkenê.” Rayberê dezgehanê sîvîlan zî dîyar kerd ke seba ke ê layîqê şehîdanê xo bibê, do têkoşînê xo dewam bikerê. Dima qiseykerdişan, sînevîzyono ke behsê têkoşîna şehîdan kerdêne amê temaşekerdene û bi wendişê mewlûdî virardiş dewam kerd.
