Wan – Welatijê Wanî tewrê mewlûda şehîdanê mucadeleya azadîye bîyî. Welatijan vat ke înan sayeyê mucadeleya şehîdan ra hebûna xo pawita. Welatijan wina vat: “Azadîya fîzîkî ya Rayberê Şarê Kurdî seba averşîyayîşê prosesî hewcedarîyêk a.”
Pêşengîya Komeleya MEYAB-DER’î ya Wanî de mewlûdêk ame dayîş. Mewlûd seba şehîdanê Têgêrayîşê Azadîya Kurdistanî bî ke deman û cayanê cîyayan de şehîd bîyê. Mewlûd salonêkê dawete de ame dayîş. Salon Taxa Karşiyaka ya qezaya Erdîşî de yo.
Welatijê ke tewrê mewlûdî bîyî, Ajansê Welatî rê qalê hîs û fikranê xo kerd. Înan qalê şehîdanê Têgêrayîşê Azadîya Kurdistanî û Prosesê Aştîye û Komelê Demokratîkî kerd.
Welatijan da zanayîş ke înan sayeyê mucadeleya şehîdanê Têgêrayîşê Azadîya Kurdistanî ra hebûna xo pawita. Înan va ke ê wina resayê nê rojan. Welatijan qetî kerd ke ê do rayîrê mucadeleya şehîdan ser o şêrê. Ê do wayîrê mîrasê înan zî vejîyê.
‘Dewlete hema gamî nêeştî’
Welatijan dîqete ante Prosesê Aştîye û Komelê Demokratîkî ser. Înan va ke herçiqas kêmasîyê prosesî est ê zî bawerîya înan bi aştîye est a. Goreyê welatijan, hetanî nika Rayberê Şarê Kurdî û Têgêrayîşê Azadîye gamê lazimî eştê. La hetê dewlete ra gamê lazimî û muhîmî nêameyê eştiş. Welatijan da zanayîş ke na bawerîya înan a prosesî şikenena. La hema zî bawerîya înan bi Têgêrayîşê Azadîye û Rayberê Şarê Kurdî est a.
‘Ganî şertê Abdullah Ocalanî rind bibê’
Welatijan qetî kerd ke seba averşîyayîşê prosesî, rindbîyayîşê şertanê Rayberê Şarê Kurdî Abdullah Ocalanî û azadîya ey a fîzîkî zaf muhîm a. Welatijan wina vat: “Serek Ocalan muzakerekarê esasî yê nê prosesî yo. Ganî o bi rehetî bireso heme beşanê komelî. Ganî o mîyanê şarê xo de azad bicuyo.”
