Anqara –Endamê Şubeyê OHD’yî yê Anqara, Dogan Şensesî, îfade kerd ke badê qanûn kewt pratîk, seba rayraberdişî ganî statuyê Rayberê Şarê Kurdî Abdullah Ocalanî bêro garantîkerdene û wina vat: “Eke statuyê birêz Ocalanî bêro zelalkerdene do vernîya çareserîye zî abo.”
Prosesê Aştî û Komelê Demokratîk ke Vakurê Kurdîstanî û Tirkîya de dewam keno, bi qanûnê çarçewayî derbazê merhaleyêka newe bi. Qanûnê çarçewa yê ‘Xurtkerdişê paştîdayîşê neteweyî û yewbîyayîşê komelî” ke 12 madeyan ra yeno pê, bi 467 raydayîşan Heyetê Pêroyî Meclîsî ra derbaz bi û bî qanûn. Badê raporê teyîd û tespîtî yê MGK’yî qanûn do bikewo pratîk. Dima ra seba teqîbkerdişî bin banê Cagirê Serekomar Cevdet Yilmazî de heyetê teqîbkerdişî bêro awankerdene û do prosesê caardişê qanûnan rayra bero. Sewbîna seba çimdarîye, Meclîsî de zî heyetêk bêro awankerdene.
Qanûnê çarçewayî ke yewin qanûnê derheqê çareserîyê problemê kurdî ameyo hedrekerdene, bi nê qanûnî raya ewila problemê kurdî çarçewayêke de ameyo dîyar kerdene. Endamê şubeyê Komela Huqûqnasanê Seba Azadîye (OHD) ya Anqara, Dogan Şensesî, derheqê qanûnê çarçewayî de Ajansê Welatî (AW) rê qisey kerd.
‘No qanûn netîceyê cigêrayîşê Çareserîya demokratîkî yo’
Dogan Şensesî dîyar kerd ke qanûnê çarçewayî, netîceyê cigêrayîşê Rayberê Şarê Kurdî Abdullah Ocalanî ê çareserîya demokratîk o û wina vat: “Problemê kurdî, dewleta Osmanîye ra dest pêkena û badê Lozanî bi parçebîyayîşê Kurdîstanî û awabîyayîşê komare de reseno asta tewr cor. Şarê Kurdî zî nê emelan qebul nêkenê û her wext vera nê emelan xo ver dayo. Vera çinhesibîyayîşî 29 serewedaritişî vejîyayê û tewr peyîn zî yê PKK’yî şerê 50 serrî yo. Birêz Ocalanî her wext cigêrayîşê çareserîya demokratîk de bî û seba çareserîya muxatabêk gêrayêne. No cigêrayîş hetanî rojê ma ya ewro dewam keno. No qanûnê çarçewa zî netîceyê nê cigêrayîşî yo. Her çiqas kêmanîyê nê qanûnî bibê zî seba destpêkerdişê çareserîya demokratîke û qanûnî merhaleyêka muhîm a. Qanûn do mîsyonê xo yê destpêkî senî ca bîyaro, do ma zî teqîb bikerê.”
‘No qanûn tena nêeşkeno çareserîye bîyaro’
Dogan Şensesî îfade kerd ke problemê kurdî tena bi qanûnêk nêyeno çareserkerdene û wina qisey kerd: “Qanûn do bade raporî teyît û tespîdî bikewo pratîk û 6 aşman biramo. Goreyê muracatanê dosyayan do bêro erjnayene. Teqîbê caardişê qanûnî zî keweno mile huqûqnasan ser. Amedekarîyê ma zî nê çî ser o estê. Badê qanûnê lazim o seba çareserkerdişê problemê kurdî, qanûnê bişumûl vejîyê. Problemê ma tîya nêqedênê ke no qanûn tena çareser bikero. Seba ziwan û kulturê kurdan lazimîya qanûnê bingeyî bêrê viraştene. Ganî qanûno bingeyîn de vurîyayîş virazîyê. Ganî qanûn heqê heme netewan garantî bikero, bêrê viraştene. Verê azadîya fikir û îfadeyê bêro akerdene. Lazimî bi xeylî vurîyayîş û biserûberkerdişanê qanûnî estê.”
‘Seba rayraberdişê prosesî ganî statuyê Birêz Ocalanî bêro garantîkerdene’
Peynîya qiseyê xo de, Dogan Şensesî dîyar kerd ke seba rayraberdena caardişê qanûnan ganî statuyê Birêz Ocalanî bêro dîyarkerdene û wina qiseyê xo qedêna: “Birêz Ocalanî nê prosesî ard na aste. Eke îmkan û şertê Ocalanî bêrê zelalkerdene, çareserîya demokratik asan bena. Coka nê qanûnî de ganî statuyê birêz Ocalanî zî ca bigro. Na lazîmîyêka gird a. Seba ke o ke prosesî rayra beno birêz Ocalan o. Ganî birêz Ocalan bieşko heme beşanê komelî de têkilî rono. Eke statuyê birêz Ocalanî bêro zelalkerdene do vernîya çareserîye zî abo. Ganî statuyê birêz Ocalan bi qanûnan bêro garantîkerdene. Sewbîna ganî îqtîdar nêzdîbîyayîş û ziwanê xo zî bivurno û bawerîyê komelî nêşikno.”
